Sajak Sunda

Dimuat di Koran Galura, Minggu ka V, Januari 2015

Sajak-sajak

Nina Rahayu Nadéa

Muru Laku

Léok ngénca, léok ngatuhu, ngajurungkeun laku

Handaruan meulah jalan kasalempang

Silisiap siliudag pagilinggisik nyiwitan wanci

Muru pati

Langit peteng mayungan haté nu canéom

Kakalicesan katebak angin tineung

Awak leuseuh teu kabanjuran doa

Nu ngaguher nu dzikir hawar-hawar nepungan langit

Mana nu leuwih rempeg?

Sedeng pati salilana ngukuntit

Kasalempang langgeng marengan

Nu Miang Ninggalkeun Asih

Aya nu leungit caroplokan tina raga katresna

Sawaréh neueul  lemah, sawaréh ngungsi wiati  nu némbongan lebah katineung

Sésa ibun katresna sumulusup dina lulurung kalbu,

Cintaning asih pamustung bahan pamiangan

Nguntunan katineung léngkah patékadan

Nyemprung lebah tanjakan asih

Di dieu aya geter karémpan

Naha katresna satuhu salalawasna?

Atawa kagiles dina sésa birahi

Katapang-Gilimanuk

Ngangkleung na sagara, nganteurkeun haté nu kuméok

Momot ngajang na saban rénghap na saban ucap

Sieun....

Ieu rénghap panungtung, ieu ugeran panganggeusan

Mingkin jauh ninggalkeun daratan

Dosa narémbongan lebah kongkolak panon

Gambar diri nu katambias patingpucunghul nepungan

Beuki jauh beuki kuméok. Kasieun nganjang ngabaju

Méotkeun haté nu lamokot dosa

Naon nu geus sayaga?

Ukur kokotor nu marengan

Nya di dieu dina sagara

Wirid teu anggeus-anggeus digalindengkeun

Maturan karémpan, maheutkeun siki tasbé nu caroplokan tiap péngkolan***

Nina Rahayu Nadea. Nulis dina bahasa Indonesia jeung bahasa Sunda. Tulisanna dimuat di:  Pikiran Rakyat, Galamedia, Kabar Priangan, Majalah Kartini, Analisa Medan, Radar Bojonegoro, Majalah Potret Banda Aceh, Majalah Baca Banda Aceh, Suara Karya, Suara Daerah, Majalah Kandaga, Majalah Mangle, SundaMidang, Galura,  Tabloid Ganesha, Tribun Jabar, Koran Merapi Yogyakarta, Majalah HAI.

hhh

Sajak Sunda di Suara Daerah Jabar

KUMPULAN SAJAK

Lalakon

Ku: Nina Rahayu Nadéa

Lalakon teuing ka mana réngkolna

Dina wates hirup jeung pati

Mangrébu pangharepan montél na diri

Maluruh kapanasaran teuing ka mendi

Lalakon teuing iraha reureuhna

Salilana ngungudag angin

Ngawélah parahu dina sagara kingkin

Mentangkeun gondéwa museur tineung

Néangan nu ditéang

Teuing ka mana jucungna

Layung ngempur mapaésan wanci sareupna

Tetengger tinggarupay

Sedeng diri?

Ngocécang na jalan nu ngolémbar

Salilana kalimpud bingung

Wilujeng Énjing Kota Garut
Ku: Nina Rahayu Nadéa

Wilujeng énjing kota Garut
Wilujeng énjing
Bagéakeun kuring nepungan
Ngalubarkeun kakangen nu ngubeng na angen
Malidkeun kaasih nu kaselir wanci heureut pakeun

Wilujeng énjing kota Garut
Wilujeng énjing
Kalakay  maluguran lawas teu kasorang
Tinggarupay ngabagéakeun kanu anyar datang
Rumasa kuring jarambah teu popoyan
Ninggalkeun panyalindungan ngajauhan katuna
Sapaparat jalan néangan sugan jeung kahayang

Wilujeng énjing kota Garut
Wilujeng énjing
Kuring mulang ka sarakan dimomotan  ku sarébu  pangharepan
Mugi anjeun teu  ngabendon
Ka kuring nu arang mulang

Lembur Kuring

Ku: Nina Rahayu Nadéa

Tina érang-érang jandéla kahirupan

Tina hiliwir angin jeung haréwos gaib

Ngawirahma larsup na lulurung waktu

Nu haliwu, ngagalindeng deudeuh,  ngaguruh baganti gorowok démonstrasi

Tina sarisig jandéla haté

Ngintip béwara ti saampar jagat

Ngintip rénghap masakat nu guyang dina  leutak kateuadilan

Naha enya?

Kaasih geus diranjah

Lembur ceuyah ku préman

Politikus parebut ngaheuyeuk nagri ngarawu untung

neundeun tunggara tina mangrebu parentul jalma

Sajak keur Candra jeung Wulan
Ku: Nina Rahayu Nadéa

Basa kuring neuteup bulan
Candra jeung Wulan  narémbongan
Imutna mabra na wiati kana sukma niruk jajantung
Ngumbar kereteg tresna nu sawirahma
Ngajanggélék putri

Basa kuring nyawang béntang
Candranaran, Wulandari patingkariceup  kana haté ngalagena dina bayah
Pataréma dina simpay kanyaah
Ngajilim inji

Tuh mayapada geus nganti anjeun
Endagkeun jagat ku pangabisa
Tandonkeun réma ka dayeuh nagri
Sawérkeun rénghap kaparigelan
Talimbeng dunya ku ketak rancagé

                Nina Rahayu Nadea, lahir di Garut - Jawa Barat,  28 Agustus. Menulis dalam bahasa Sunda dan bahasa Indonesia. Karyanya dimuat di beberapa media. Telah menghasilkan kurang lebih 60 buah buku antologi. Tahun 2011 memenangkan lomba Soulmate Writing Battle Leutika Prio-Yogyakarta. Tahun 2012  Juara naskah terbaik cerpen anak Hasfa Publisher, dengan judul cerpen ‘Si Jalu Kesayanganku’. Tahun 2013 naskah barakatak terpilih di Majalah Mangle, dengan judul ‘Teu Gaduh Artos’. Tulisannya bisa dilihat di www.ninarahayunadea.blogspot.com