Cai Laut Asin
Ku: Nina Rahayu Nadéa
Ceuk
béja
nu dibéjakeun
deui. Pabéja-béja.
Baheula téh
aya dua lalaki, adi lanceuk. Lanceukna ngaranna Jana ari adina Jani. Sanajan
enya adi lanceuk, tapi pasipatanna kacida patunggang tonggong. Kitu deui
nasibna sarua béda, jauh tanah ka langit. Jana mah kaasup jelema beunghar, harta lubak
libuk, ceuk kasarna bru di juru bro di panto ngalayah di tengah imah. Sedeng
Jani mah kaasup jalma anu miskin, seuseut seuat, hirupna hésé pisan menyatna.
Sanajan
enya beunghar tapi sipat Jana kacida medit. Koret. Kékéd méngkéné. Cap Jahé,
méré gé hésé.
Buntut kasiran. Teuing naon pibasaeunna ka jalma anu pedit pisan. Ari Jani
sanajan enya jalma teu boga, hésé dahar, tapi lamun keur
manggih rejeki, manéhna béréhan jeung sok daék tutulung. Atuh heunteu méré
ku matérina,
tanaga mah pasti siap sadia ngabantuan jalma nu ngabutuhkeun. Bari jeung teu pamrih.
Gawé
karna ihlas teu ngarepkeun nanaon. Matak pikaresepeun batur.
Dina
hiji waktu, Jani keur manggih karerepet. Ningali sangu dina boboko suwung,
euweuh saréméh-réméh acan. Kitu deui waktu muka padaringan, euweuh béas sasiki-siki acan. Kacida pisan haténa
ngenes jeung nalangsa. Komo waktu nyaho tatanggana gé sarua teu bisa nulungan. Da
ngan aya keur maranéhna hungkul. Antukna ngagedig ka lanceukna. Sanajan salila
ieu mindeng kanyeri anu katampa ku dirina. Sipat lanceukna nu pedit téh,
teu ngan saukur ka batur. Tapi kitu ogé ka dirina, adi tegesna, sarua jeung
ka batur. Pedit.
Tapi
kusabab butuh. Jeung susuganan lanceukna méré, dihoréam-horéam gé, kapaksa Jani nepungan
lanceukna.
“Rék
naon Jani ka dieu? Rék nginjeum béas?” cenah. Karék gé nepi panto imah geus disampakeun
pananya anu matak nyeri haté. Kaciri pisan sieun kasoro jeung
sieun diinjeuman téh.
“Enya,
Kang. Sugan wé atuh aya saeutik mah,” témbal Jani halon.
“Nyeta
euweuh di dieu gé. Sarua kosong pisan.” Jana ngomong teugeug.
“Enya
atuh keun we ari euweuh mah.”
Tapi
waktu balik, pamajikan Jana ngagupayan ti panto dapur. Manéhna
karunyaeun pisan ka Jani nu butuh béas.
“Yeuh
bawa jing tong geruh,” cenah méré béas jeung deungeunna. “Omat
tong bébéja
ka Jana.”
“Nuhuuun
pisan, Ceu,” Jani ngomong bari ngeclakeun cipanon bakat ku atoh.
Di
satengahing perjalanan waktu rék mulang, Jani panggih jeung hiji
aki-aki. Rudin pisan sarta nyarita, geus sababara poé teu manggih dahareun.
“Hayu
aki, urang ka imah kuring,” Jani
ngajakan éta aki-aki. “Hayu urang dahar, saayana di imah, kabeneran
kuring boga rejeki,” Jani
nembongkeun pamahanan pamajikan Jana. Sanajan dibahanan béas saeutik, tapi haténa teu kasieunan karewong ku éta
aki-aki.
Waktu
ngadéngé
kitu si aki-aki atoh kacida. Sarta nuturkeun leumpang muru imah Jani.
Di
Imah Jani, éta
aki-aki diaku kalawan daréhdéh.
Bahan kadaharan anu meunang paméré téa, gura giru dipasak. Geus
asak, terus didahar babarengan. Balakécrakan. Kabéh dahareun ditembrakeun, teu aya nu
disumputkeun saeutik-eutik acan. Nembrak saayana.
Isukna,
éta
aki-aki amitan ka Jani rék mulang.
“Geus,
Ki di dieu wé
atuh saheulaanan,“ ceuk Jani ngahulag.
“Ah,
keun wé
Jang, aki mah rék neruskeun lalampahan. Aki nganuhunkeun ka Ujang nu geus nulungan
aki.”
Éta
aki-aki ka luar ti imah Jani. Tapi saacana, éta aki-aki méré
halu jeung lisung ka Jani. Sarta ngabéjaan yeun éta barang téh lain barang samanéa. Tapi halu jeung lisung ajaib. Kahayang naon waé, pasti bakal katedunan. Carana tinggal nutukeun
halu kana lisung tilu kali bari jeung nyebutkeun naon anu dipikahayang. Sarta
keur ngeureunkeunna tinggal ngasupkeun taneuh kana lisung.
***
Kacaritakeun,
ayeuna Jani geus jadi jelema beunghar. Tapi sanajan beunghar, sikepna angger
siga baheula. Béréhan ka sasama, daék
tutulung. Teu pindah pileumpangan. Kabeungharan Jani geus nerkab ka mana-mana.
Nepi ka ceuli Jana lanceukna. Jana kacida sirikna ngadéngé adina geus beunghar.
Dina
hiji poé,
Jana nepungan adina. Sarta nanya ku naon
bisa beunghar. Harita Jani teu neundeun curiga ka lanceukna. Ngeunaan
papanggihana jeung hiji aki-aki nu méré jimat lisung jeung halu tug
nepi ka cara-cara ménta pamaksudan ka éta
barang teu aya nu dibuni-buni. Kabéh
dicaritakeun ku Jani ka lanceukna.
Ngadéngé kitu, Jana ngageremet dina
haténa.
Sarta hayang ngapimilik lisung jeung halu téa. Dina waktu Jani bongoh.
Kalawan demit, Jana nyokot éta
barang. Ngahaja manéhna teu balik deui ka imahna. Tapi langsung ka alas peuntas
maké
parahu. Ngahaja méh teu disusul ku Jani.
Dina
hiji poé
waktu parahu keur aya di tengah laut. Jana butuh pisan uyah. Inget kana lisung
jeung halu bogana Jani. Harita kénéh langsung dikaluarkeun.
“Tutu...tutu...tutu...uyah!”
Teu
sakara-kara tina lisung ka luar uyah. Tapi Jana reuwas waktu inget, yén
manéhna
teu mawa taneuh pikeun ngeureunkeun uyah anu ka luar. Antukna uyah terus
ngaburial tina lisung ajaibna, terus teu eureun-eureun nepi ka minuhan lisung.
Minuhan parahu. Bakat ku beurat éta parahu jeung sakabeh panumpang, kelebuh. Tah ti dina nepi ka kiwari cai laut
teh jadi asin. (Nina Rahayu Nadea, tina sababaraha sumber)
Tidak ada komentar:
Posting Komentar