Dahar Nikmat
Ku: Nina Rahayu Nadéa
Ngahaja
daging beubeunangan tina jatah kurban téh disiksikan laleutik. Méh
teh hésé
teuing nyapék.
Maklum huntu geus méh béak. Ari kana dadagingan masih kénéh hayang. Sanajan ceuk batur
teu nalipak manéh. Haté kumejot hayang dahareun nu ngeunah
ari huntu geus teu méréan. Nya diakalan. Daging diprékprékan heula ku mutu, terus dikeureut
laleutik. Teu nanaon gégéréntélan. Nu penting bisa kadahar ku kuring jeung nu jadi
salaki.
Meungpeung
euweuh barudak. Pan, lamun araya mah sok sagala dihulag. Itu ulah ieu entong.
Nu ngeunah sagala disumputkeun. Bisi didahar ku kuring. Sakapeung mah sok
keuheul ka barudak. Ari incu dititip-titip, ari boga kadaharan ngeunah
disarumputkeun. Tapi kétang kuring ngarti. Bakat ku nyaah kanu jadi kolot. Boga
panyakit.
Maju
ka kolot panyakit naluturkeun. Darah tinggi, diabétés, koléstérol. Tapi kangaranan resep.
Teu bisa dihalangan ku batur. Sakapeung dicarékan ku nu jadi anak. Majar téh
teu bisa ngatur. Teu nyaah kana awak. Puguh nyaah awak, hayang ngadahar nu
ngeunah, meungpeung hirup. Kitu wéh dijawab téh.
“Do’akeun wé, anggursing séhat,
nambeh bisa ngurus incu,” cekéng ka barudak. Barina gé
moal loba, asal ngasaan. Barudak teu bisa majar kumaha. Tungtungna ngantep.
Geus
dikeureutan terus dipasak maké bumbu basajan. Teu poho maké kécap rada loba. Méh
teu kaambeu teuing hanyir. Jeung babakuna mah salaki kétang resep kana bumbu kécap
téh.
Sawatara lila diantepkeun heula. Sina hipu dagingna. Selengseng seungitna geus kaambeu,
ngahiliwir. Nguniangkeun rasa lapar nu tatadi geus nyayang. Salaki geus
sababaraha kali mukaan katél. Ngoéran daging ku séndok.
“Sabar
ke sakeudeung deui,” ceuk kuring. Ningali polah salaki nu bangun teu sabar.
Teu
sawatara lila daging asak. Gura-giru dipernahkeun. Diangkat. Diwadahan kana baskom parantina. Terus
diteundeunan. Teu di meja makan. Hayang dahar nikmat. Ngampar di hareupeun
tivi. Kabéh
dipernahkeun di dinya méh teu ajag-ajig.
Sigana
dahar téh
beuki nikmat. Sangu ngebul katambah dibarengan kunu jadi incu satilu-tilu.
Dibaturan haleuang Cianjuran tina tivi. Tumaninah. Kabéh surak waktu pasakeun geus réngsé.
Ngajagrag di hareupeun tivi.
“Nin,
emam ayeuna nya?”
“Enya
sok, ngawadahan.”
Harideng
sorangan, incu nu dua ngawadahan dahareun. Geus gede. SD. Ari nu leutik mah 3
taun, sawadah wéh jeung kuring da can bisaeun.
Kabéh
balakécrakan.
Nikmat naker. Enyaan. Salaki gé kuat ka sababaraha kali mindo. Bakat
ku nikmat cenah.
Kuring
gé
sarua kabawekeun nikmat. Dahar ponyo babarengan. Bari jeung ngahuapan nu jadi
incu.
Sangu
dina piring kari satengahna. Waktu incu nu leutik, mugen dihuapan. Teu daék
cicing.
“Enggal
emamna.”
“Aim
ah, aim.”
“Atos
emamna?”
Budak
unggek.
Kuring
gé
teu ngahuapan deui. Tungtunan jongjon ngahuap sorangan.
“Leuh
abong budak, éta meuni marurag kitu, tuh daging di mana waé,”
salaki nujuk kanu ngagéréntél hideung, gigiren incu kuring nu leutik.
“leuh
enya wé
yeuh si geulis. Nyaah Néng tong dipiceunan,” ceuk kuring bari nyelemun kana éta
daging. Rék
dihuapkeun pisan. Tapi kéké naha beut asa bau....
“Ku
naon ngahuleng lain huapkeun lebar.”
“Kéla
bauna asa anéh.”
“Anéh
kumaha,” salaki nyokot daging tina leungeun kuring. Laju ngadeukeutkeun kana
palebah irung. “Huo...ieu mah lain daging
atuh. Ieu mah siga bau...” teu kebat ngadon ningalikeun kanu jadi incu. “Tingali
éta
budak siga ngaheujeun.”
“Ade
éé?”
kuring nanya.
Manéhna
unggek.
Leuh
nu disangka daging teh geuning bukur tina imbit si geulis. Incu nu leutik kénéh.
Untung wéh
can dihuapkeun.
Tidak ada komentar:
Posting Komentar