Nyegah Tawuran
Ku: Nina
Rahayu Nadéa
Tawuran nyaéta hiji kagiatan ti
mimiti paséa tug nepi ka pacogrégan, pagétréng atawa ngalakukeun lampah anu
nyababkeun ayana ‘adu fisik’, sacara langsung atawa teu langsung anu dilakukeun
ku sakelompok atawa golongan nu aya di masarakat. Nilik kana artina, kecap
tawuran téh kacida dipahing ku sakabéh jalma. ku sakabéh masarakat. Coba titénan naon balukar tina tawuran. Lian ti karugian materi, tapi ogé immateri
pasti katampa ku sakabéh palaku tawuran, sarta ngarugikeun pihak-pihak lainna.
Anu jadi kasalempang jeung kahariwang
dina danget ieu, yén tawuran téh ayeuna geus nerekab ka budak sakola anu umurna
keur labil. Plin plan. Coba urang titénan kajadian anu dilakukeun ku budak
sakola. Lain hiji dua waé kajadian balukar tina tawuran anu geus dilakukeun ku maranéhna,
tapi geus kacida réana. Tawuran saolah geus biasa dilakukeun. Sarta dianggap
kalakuan anu teu pira. Lumrah. Maranéhna
‘budak sakola’ anu kuduna cicing di sakola,
ngabandungan, nampa pangajaran ti para
guru, hirup di jalan. Anu sakuduna bubar ti sakola balik ka imah séwang-séwangan.
Anggursing turun ka jalan babarengan jeung batur sabalad-balad ngayakeun
tawuran.
Tah hal éta pisan anu ngajadikeun réngréngan
pangatik turun komarana. Maranéhna salaku pajuang widang pendidikan geus dianggap
tolédor kana kajadian ieu. Tangtu waé hal ieu téh jadi masalah kabéh guru.
Nu pasti kabéh guru, tinangtu geus méré isarah tur méré aturan ka anak
didikna sangkan teu ngalakukeun hal anu ngalanggar aturan.
Anyar-anyar ieu kungsi kadéngé, pamaréntah seja nambahan jam pelajaran di
sakola. Pikeun ngungkulan masalah tawuran anu beuki mahabu waé. Hal ieu
dilakukeun sangkan ruang lingkup jeung nyebarna tawuran mingkin nyaeutikan.
Salaku pangatik kudu sugema
saheulaanan, réhna kajadian tawuran geus aya perhatian anu leuwih ti pamaréntah. Sanajan kudu diimetan deui
alus heunteuna nambah jam pelajaran di sakola. Tapi leuwih jauh ti éta, urang
salaku pangatik nu salilana aya di lingkungan sakola, gawé bareng jeung nu lain
di sakolaan kudu nyieun cara-cara anu leuwih kondusif sangkan anak didik urang
teu kabaud ku hal négatip. Utamana tawuran.
Kungsi dina hiji waktu, anak didik
nu ulubiung ngilu tawuran ditanya kunaon alesanna, manéhna ngiluan tawuran. Tapi
nu leuwih ahéng téh loba diantarana nu teu ngarti jeung teu apal nanaon kana
kasus atawa kajadian. Maranéhna daék
ngalakukeun tawuran pédah diajak
ku babaturanan. Dapon diajénan, réhna manéhna ‘setia kawan’ jeung dianggap gaul. Loba diantarana asalna moal
ngiluan tawuran, tapi teu ngeunah basa disebutkeun teu gaul, kampungan jeung nu
leuwih parah titél kamseupay napel
dina dirina. Tah hal éta pisan anu antukna ngajadikeun maranéhna daék ngalakukeun
tawuran bari jeung teu apal masalah nanaon.
Naha bener heuteuna ngiluan tawuran,
ribut jeung batur disebut kampungan, teu gaul, kamseupay? Jejer ieu nu kuduna ditepikeun ka barudak. Dibéjér béaskeun nepi ka béak beresih. Béré
conto-conto nu nyata balukar tina tawuran jeung béré conto nyata para pelajar
anu sukses. Tindak tandukna langsung diajénan sarta ngaranna nyongcolang tur méré
akibat nu kacida positipna keur dirina, sakolana, kulawarga pon kitu deui
lingkunganna.
Urang balik kana sikep pelajar anu notabene umurna keur dina tahap
berkembang. Keur meujeuhna butuh pangrojong jeung kasabaran. Hiji teori nu dikedalkeun
ku Kurnia (2007) nyebutkeun aya sababara kriteria budak anu ku urang kudu
dipikanyaho: :
1. perkembangan masa anak awal (2-6 taun)
Tabéat budak hésé
diatur, bandel, heuras, sering ngahulag jeung ngalawan ka kolot. Hal ieu nu
ngahésékeun para pangatik. Teu anéh, lamun para guru Playgroup nepi ka SD kudu
leuwih sabar dina ngalangsungkeun pangajaran, ngaping, ngadidik siswa. Peran
para pangatik kacida mawa pangaruhna keur perkembangan umur budak.
2. perkembangan masa
anak akhir (6-12 taun)
Dina umur ieu,
pangaruh babaturan kacida kuatna tibatan kolot. Lolobana dina umur ieu maranéhna
kurang merhatikeun jeung teu boga rasa tanggung jawab kana baju jeung
barang-barang milikna.
3. perkembangan masa
puber (11/12 – 14/15 taun)
Lian ti robahna segi pisik, sikep puber ieu mawa
pangaruh kana nurunna prestasi diajar. Kolot, guru jeung nu lainna anu aya
hubungan jeung maranéhna kudu bisa ngamaklum kana umur maranéhna. Maranéhna
mindeng ngucilkeun diri, emosional, ngalakukeun hal negatif jeung lain-lain.
Urang nu aya di lingkungan maranéhna kudu bisa ngabantu maranéhna sangkan tetep
bisa aya dina jalan anu lempeng.
Dumasar kana téori di luhur bisa
katiténan ku urang, yén barudak nu kaasup ‘usia sakola’ keur meumeujeuhna neangan
jati diri, naluntik naon rupa kapanasaran anu nyangkaruk dina haténa. Maranéhna
keur meujeuhna labil, butuh batur keur marengan léngkahna jeung ngajadikeun balad
sarta ngadukung kana sakabéh kalakuanna. Asa pangaingna, asa aing pangpunjulna
tinu lian. Tah, dumasar kana éta urang
saréréa kudu surti yén umur anak didik
téh memang bener-bener keur labil jeung gampang pisan kapangaruhan.
Umur siga maranéhna neundeun energi anu rohaka. Jadi mindeng kajadian ‘napsu
nu matak kaduhung badan anu katempuhan’. Poho kana lilingeran. Kabadung, kasiku
saeutik lain nalar anu maén tapi pisik anu maén. Kitu meureun kajadian anu karandapan
ku barudak, nepi ka kajadian tawuran.
Anu jadi kahemeng urang saréréa,
loba kolot anu teu ngaku yén budakna geus jadi palaku tawuran. Sanajan enya-enya
geus puguh kacerek. Jeung nu leuwih anéh deui loba kolot anu nyalahkeun pihak
sakola, nempuhkeun pihak sakola,
nyalahkeun pedah disiplinna kurang. Balik deu ka sakola séwang-séwang.
Enya kitu kadisipilinan sakola masih logor? Atuh anu ngarasa sakolana geus
ngarasa bener-bener ngadidik budak,
nyieun aturan anu teges, kudu jadi bahan kamandang saréréa, kunaon barudak bisa
lolos jeung angger ngiluan tawuran?
Éta kabéh kudu jadi bahan paguneman
kabéh pihak. Lain ngan saukur nyalahkeun ka sakola, nyalahkeun budak. Tapi kudu
jadi pamikiran, sangkan kabéh ngalakukan
norma-norma luyu jeung widangna séwang-séwangan.
Ti baheula mula ‘tawuran’ memang geus
aya. Ngan perséntasena leuwih saeutik batan ayeuna. Tekhnologi, HP, internét
jeung lainna mémang méré pangaruh anu kacida gedéna keur maranéhna, salaku ‘anak
didik’.
Aya hiji cara pikeun ngurangan
tawuran nyaeutikan. Lian ti nyieun
aturan. Salah sahiji cara anu saeutik mudah-mudahan bisa nyingkahan tawuran.
Tulis kalawan écés, jéntré, tembongkeun
ka para siswa yén sing saha waé anu ngalanggar aturan, baris dibéré sangsi.
Jeung mun teu euih-euih bisa nepi ka dibacklist.
Dina waktu anu kosong atawa iraha waé
anu dianggap merenah. Selipkeun jejer ngeunaan tawuran. Jelaskeun dina tiap
acara naon goréngna tawuran, sebutkeun kalawan écés yén dina tawuran, saha waé
moal aya nu untung. Nu pasti bakal ngalaman karugi nu pohara.
Cara lain. Wajibkeun budak milih
salah sahiji éksklul anu aya di sakola. Tekenkeun ka maranéhna sangkan
bener-bener ulubiung ngiluan acara ékskul. Lain ngan saukur ngaranna wungkul.
Tapi yakinkeun ka maranéhna, yén ku ayana ngiluan ékskul bisa nambahan kagiatan
positif tur bisa nambahan pangaweruh. Lian ti éta, poténsi anu aya dina diri
budak bakal kagémbléng sacara nyata.
Sipat
budak anu keur meujeuhna liar teu kauger ku aturan, urang salurkeun kana
hal-hal anu positif. Titénan kamampuh budak sarta ulah poho salurkeun kalawan
gemeut tur daria ku pihak sakola. Malahmandar budak bisa nonjolkeun hiji poténsi
anu leuwih sanajan heunteu nyangkut masalah pelajaran. Budak anu ‘bore’
nyanghareupan palajaran nu mingkin beuki ngarieutkeun uteuk, kaubaran ku ayana
préstasi di widang lain anu ku maranéhna dipikaresep.
Lian ti éta nyieun acara anu maneuh.
Hangkeutkeun tali silaturahmi jeung sakola lain. Gawé bareng jeung sababaraha
sakola dina kagiatan kerja bakti, pasanggiri. Misalna waé olahraga, kesenian atawa
cerdas cermat. Nu dipiharep ku ayana kagiatan anu manjang tur nuluy, budak
bakal loba kawawuhan sarta pamikiranna teu heureut. Anu tadina ngan saukur
ulukutek di sakola dina widang palajaran. Saeutik saeutik pamikiranna terbuka
tur bisa ngigelan jaman. Sahanteuna ku loba babaturan, loba pamikiran anu
dipiharep positif sarta nyingkahan kagiatan anu négatif seperti tawuran tadi.
Anu leuwih penting lian ti sakola
anu ngahangkeutkeun acara sangkan tawarun teu mahabu. Nu leuwih penting nyaéta
ti lingkungan nu leutik heula. Lingkungan kulawarga. Perlu diinget kulawarga
mangrupakeun pondasi anu kacida kuat jeung diperlukeun pikeun perkembangan
budak. Dimana waé, di lingkungan mana waé, peran serta kolot kacida perlu.
Kanyaah kolot moal aya bandingana. Loba
kasus budak ‘broken home’ anu beuki
kanceuh lamun geus turun ka jalan. Mugia waé ku ayana pangaping ti kolot, pihak
sakola, jeung nu lainna bisa tetep ningkatkeun ajén inajén pendidikan di urang.
Malahmandar pendidikan di urang bisa kaala hasilna, teu kapangurahan ku hal-hal
négatif. Komo deui ku tawuran.***
Nina
Rahayu Nadéa. Lahir di Kota Garut 28 Agustus. Nulis dina bahasa Sunda jeung
bahasa Indonesia. Karyana mimiti dipublikasikeun ti taun 2007. Tulisanna bisa
dipaluruh di www.ninarahayunadea.blogspot.com
Tidak ada komentar:
Posting Komentar