Sabada Lilir
Ku: Nina Rahayu Nadéa
“Kumaha geus
dipikiran kahayang Akang jeung Ceu Yati téh? Éta mah kumaha Jana waé, rék milih pagawéan anu ti Akang hadé atawa pilihan Ceu Yati gé hadé!”
Manéhna ukur ngeluk, teu lémék teu nyarék.
“Déngékeun Jan, Akang jeung Ceu
Yati ngahaja ka lembur téh lain ulin teu puguh,
tapi ngahaja nepungan Jana, hayang aya kacindekan. Ulah ngolémbar cara sasari.
Mudah-mudahan ieu jalan nu paling hadé keur Jana. Sugan wé atuh ku jalanna ieu aya
kamajuan keur hirup hurip Jana. Kudu asak jeujeuhan nanaon gé. Sing percaya Akang jeung
Ceu Yati néang jalan panghadéna keur Jana. Tapi Akang gé moal maksa ka Jana.”
“Muhun tos diémutan,” méh teu kadéngé.
“Jadi rék milih numana?” Aya
pangharepan tina haté pangjerona.
Manѐhna ngarénghap panjang siga nu suda
ngabudalkeun bangbaluh.
”Hapunten Jana,
sanés rék ngajaheutkeun manah Akang, kanggé ayeuna mah Jana badé di lembur waé ngokolakeun pasantrén sasarengan sareng Ajengan Solihin.”
“Teu sesuai
gajihna? éta mah gampang.”
“Sanés kumasalah gaji.”
“Jadi ?!”
kuring nyeuneu.
“Hoyong
langkung leres-leres ibadah, hoyong tingtrim pikir.”
“Naha lamun
digawé di Bank teu bisa ibadah? atawa lamun digawé di kantor pajak teu bisa?
Pikir sing jero atuh, réalistis kawas lain sarjana waé, teu kapikir kumaha ka
hareupna? Naha teu lebar boga ijazah sarjana bari jeung nilai cumlaude ? Akang jeung Ceu Yati ngahaja néangan gawé. Lain sakali dua kali.
Matak ayeuna mah ngahaja néangan téh anu di Garut, méh Jana bisa bari jeung
ngokolakeun pasantrén.“
“Tos diémutan éta gé, Kang, mugi Akang
teu renggat galih”
“Nya baé atuh ari geus dipikiran
mah, kuma manéh waé,” aya nu nyeletit kana ati
asa aya nu nonjok mamaras, ngagolak dina jeroan dada.
Amarah
nyongkab, keuheul, hayang kumaha boa. Enyaan asa teu diajénan kunu jadi adi. Padahal
batur mah ngahormat ka kuring téh leuwih ti misti. Tapi
teu bisa kumaha, manéhna geus déwasa, geus boga hak pikeun
nangtukeun pilihanna. Enya gé kuring lanceukna tapi meureun manéhna ngabogaan prinsip
sorangan. Lain sakali dua kali nawaran gawé ka manéhna téh. Sok asa éra ku babaturan anu ngejeujeuhkeun gawé. Kajeun méré paleuleueur, uculan
sabaraha juta gé teu nanaon asal adi bisa jeneng.
Tapi na ari dibéjakan ka jinisna ngadon embung.
Teuing kamana pikiran si Jana.
Tapi geus kajudi
ti anggalna manéhna nolak deui. Ah, ayeuna mah geus gilig.
Geus buleud patékadan jeung Yati kuma karepna waé. Sina karasaeun ku manéhna. Naha bisa saendeng-
endeng hirup ti pasantrén bari teu digawé? Ah ironis pisan jaman
kiwari aya jalma nu teu butuh duit.
Aral sakapeung
mah ningali manéhna ulukutek wé di lembur, di pasantrén. Nyaho kieu mah teu kudu
dibiayaan kuliah nepi ka jadi sarjana.
Sakapeung sok éra ku tatangga nu lain, anu ngomongkeun Jana. Majar téh cenah lebar kuliah, ari heug ngadon di lembur waé. Enya da lain kahayang kuring. Kahayang mah Jana gawé nu maneuh siga kuring
jeung Yati, siga dulur- dulur nu lainna. Macakal dina gawé. Bréh imahna, bréh mobilna. Éstu pada
mikareueus ku balaréa. Bohong lamun teu butuh duit. Ku
duit mah éléh sagala gé. Buktina? ku urang lembur
kuring ayeuna pada ngambeuan. Kuring lain Taryana anu baheula nu sok mantuan Ambu jeung Abah di sawah. Taryana anu
ayeuna mah geus jadi ketua hiji partai anu gedé. Unggal ka lembur teu welѐh ganti mobil. Teu weléh angkaribung ku babawaan.
Lamun teu
inget omongan Ambu waktu jumenѐng mah meureun kuring gé rék apilain moal ieuh ngurus
Jana. Tapi Ambu jeung Abah geus ngawanti-wanti sangkan kuring bisa ngajeujeuhkeun
Jana nepi ka jadi jelema. Matak sateuayana Ambu, kuring salaku anak panggedéna tisuksruk tidungdung néang kipayah. Ngabélaan Yati jeung Jana. Sanajan Ambu jeung Abah
ngantunkeun téh ninggalkeun sawah anu
kacida legana, tapi kuring teu hayang ngajualan pakaya titinggal aranjeunna.
Kuring hayang nyakolakeun adi-adi ku késang sorangan. Alhamdulillah
kacumponan. Ayeuna duanana geus jadi sarjana. Yati mah bérés kuliah téh nurut kahayang kuring, bisa gawé di tempat panuduhan kuring.
Geus katingali ayeuna senang ngahenang ngahening.
Komo Jana mah
pan sakolana gé meunang beasiswa prestasi, cumlaude. Matak reueus kulawarga. Tapi nya kitu geuning bérés kuliah téh manéhna mah embung digawé. Geus opat taun cicing waé di lembur. Alesanna mah
nyéta hayang ngokolakeun pasantrén, karunya ka barudak
lembur cenah euweuh nu merhatikeun dina bidang agama. Mang Uyan, pakacar nu
nunggu imah Ambu kungsi nyarita, cenah barudak lembur téh béda pisan tisaprak aya Jana. Kabéh para pamuda anu biasana
ngan saukur gegenjréngan, tinglaliud teu puguh, ningali Jana téh lir aya simaan. Kabéh ayeuna mah rarajin ka
masjid, ka pangaosan. Pokona Jana pada mikaajrih. Barudak ngora anu tadina sok
garelut, paraséa ayeuna mah akur. Ubarna mah teu pira ukur ngilu ngobrol
di sisi jalan nyampeurkeun komunitas pamuda-pamudi anu keur ngariung. Ngilu
nangkring, aya nu gapléh ngilu gapléh. Ngan kitu dina waktu
geus manjing sholat tara poho ngélingan
jeung ngajakan. Mimitina mah, haré-haré waé, tingcalengir. Tapi lila-lila mah léah, marénahna sok daék ka masjid.
Rokok diseuseup antaré. Rarasaan kekebul rokok
ngumpul na jero dada. Ngalongsongkeun haté nu sumpek.Ngahaneutan
dada nu samagaha. Sanggeus rada lila haseup rokok dikaluarkeun bari jeung rénghap panjang.
Bangbaluh ngumbul ka luhur paudag-udag
jeung haseup rokok. Sungut manyun metakeun
imajinasi. Haseup rokok mulek aya nu buleud gedé, aya nu buleud leutik, aya ogé nu teu puguh pabaliut.
Sarua jeung pabaliutna haté.
Panon anteng neuteup lalangit. “Beunang siah, tong wani wani nincak hulu
ka jelema gedé!” Teu kaampeuh biwir engab basa ningali reungit dicapluk sakadang cakcak.
Asa ngilu bungah ningali cakcak bisa nyapluk reungit, anu titadi diudag. “Nu
leutik mah dimana-mana gé pasti éléh!” Kuring ngomong rada
tarik bari juru panon ngarérét ka Jana. Nu ditingali mah haré-haré.Teuing kadéngéeun teuing heunteu atawa
api-api teu
kadéngé, da nu sidik mah manéhna langsung cengkat.
“Rék ka mana?”
“Punten, Kang, badé ka madrasah heula
kaleresan sakedap deui aya pangaosan ibu-ibu.”
*
“Wayahna Akang kudu ngilu ayeuna kénéh ka kantor KPK.”
“Ké…ké perkara naon ieu téh!”
“Tong loba
alesan pan geus nyaho tianggalna gé!”
“Sabar-sabar
mending ngopi heula kalem lah aya jatah,” hideng leungeun narik laci méja, ngaluarkeun amplop
warna coklat. Terus dibikeun ka éta lalaki
Manéhna ngan saukur seuri.
“Hampura, KPK teu butuh
nu kitu,” témbalna teugeug bari leungeunna rikat ngaborgol leungeun kuring.
“Nanaonan ieu téh ? jeung maén borgol sagala, siga
penjahat waé!”
“Bongan di
dinya teu kooperatif . Geus ké wé di kantor caritakeun, jeung
pikiran naha nu korupsi milyaran nyaplukan duit nagara lain penjahat? Hayu buru ngilu ka kami.”
Tibatan
nuturkeun ieu awak kalah murengked di juru panto. Manéhna narik, kuring mundur kitu
jeung kitu wé, peurih dina leungeun beuki karasa, tapi leuwih peurih haté nu dianggap penjahat.
Teuing ti mana
jolna ujug-ujug burudul wé sababaraha jalma asup ka jero imah
sarta langsung ngarejengan awak kuring. Aya anu najong, neunggeul, jeung
rupa-rupa bari tingjorowok
“Kadieukeun
duit aing!”
“Mending paéhan wé jelema anu ngaranjah duit
rahayat mah tuman!”
“Tulung. Tulung!”
Awak babadug ka ditu ka dieu, leungeun tihothat.
Geblug
“Aw”
Nyah beunta
geus nyampak di handapeun kasur. Duh geuning ngan saukur ngimpi. Tapi naha meni
asa enya jeung awak ngadadak lungsé? Golédag kana kasur deui. Tapi
teu daék reup, sagala dipikiran. Rus-ras ka ditu ka dieu. Inget kana ngimpi.
Antukna ngadon ngahuleng ngumbar lamunan.
Inget kana
masalah nu ayeuna keur dirandapan ku kuring. Boa-boa ieu ngimpi téh totondén nu aya pakaitna jeung
masalah kuring. Enya dina haté pangjerona kuring rumasa geus nyieun
kasalahan,
ngarémpak aturan. Tapi pan biasana ge aman-aman waé, tara aya nu
maluruh.Geunjleung sotéh, pédah we ayeuna aya KPK. Kasebelan. Awak ngadadak bayeungyang
mikiran ieu masalah. Hayang kuring tingtrim teu boga masalah nu ruwet siga
ayeuna. Hayang kuring bébas tina bangbaluh nu ngarungruman jiwa. Kolébat
beungeut Jana di lembur némbongan. Baju koko, dikopéah haji, diuk menekung dina
pangsujudan. Duh aya ku tingtrim.
*
Rekét aya nu muka panto. Dirérét Jana. Nyokot baju koko
tina kapstok tukangeun panto kamar.
“Punten
kaganggu kulemna, Kang!”
“Rék ka mana, peuting kénéh
geus nyaring?”
“Badé ka masjid. Tos cekap tos
tabuh opat!” manéhna kaluar ti kamar.
Kuring
ngarahuh panjang. Dua bulan kaliwat kuring kakara ti ieu lembur. Mawa paniatan
jeung kahayang nu tojaiyah jeung kahayang Jana. Dua bulan anu kaliwat haté dilimpudan ku dengki ka
manéhna nepi ka téga nyieun hiji kaputusan, teu méré waragad ka Jana. Diwawas ku diri, manéhna bakal aral. Diwawaas manéhna bakal keuheul ka Mantenna. Tapi nu diimpleng teu
ngabukti. Manéhna angger Jana nu baheula nu tara ngarasula, nu getol
syukuran, jeung getol ibadah. Manéhna tara lumpat tina
masalah. Éstu lalaki sajati. Teu siga kuring ayeuna nu nyingkah tina masalah.
Enya pan niat kuring ka lembur téh hayang nyingkahan
masalah nu keur tumiba ka diri kuring.
Hawa nu tadina
tiis nyelecep kana tulang, bet asa panas karasana. Simbut nu asalna ngabakutet
kana awak, teu dipaké. Ngalumbruk di sisi
risbang. Hawar-hawar sora adan awal ngalanglaung.Terus kadéngé nu ngahudangkeun di
masjid méré tangara ka sakumna umat Islam nu
kumelendang pikeun sayaga ibadah nyanghareupan Sholat subuh. Nu macakeun doa
beuki réang. Awak beuki bayeungyang. Késang ngagarajag renung
dina tarang turun mapay-mapay kulit pipi laju murag maseuhan risbang.Teu lila kadéngé adan subuh. .Teu diwaro.
Beuki anteng dina alam panglamunan. Kagebah ku
sora tina spiker anu halimpu. Asa apal kana sorana. Nu tadina
haré-haré beut jadi kagémbang ku éta sora anu dilagamkeun.
Bet siga-siga sora Jana. Karasa tingtrim kana haté. Sorana halimpu, antaré. Sakapeung tatag,
sakapeung ngalengis, nyiwitan haté nu ngadéngé.
“Ya
Alloh
Mugi
gusti nepungkeun abdi ,sareng dulur dulur abdi
Kempelkeun
abdi sadaya ka tempat anu sawarga
Ya
Alloh
Mugi
gusti nepungkeun abdi, sareng ibu rama abdi
Kempelkeun
abdi sadaya ka tempat anu sawarga”
Lalaunan awak
cengkat tina risbang. Jung nangtung. Rekét mukakeun panto. Léos ka cai. Wudhu. Pagawéan anu geus lila tara
dilakonan. Salila ieu hirup ngan saukur néangan dunya. Guyang dina
leutak politik anu pinuh ku dosa. Nu dipikiran ngan saukur duit, duit jeung duit. Euweuh pisan
waktu mikiran kahirupan lain. Akhérat.
Bar sajadah diamparkeun.
Nu ngeyembeng dina biwir panon teu kaampeuh, ngeclak. Inget kana laku
lampah nu tara ngalakonan sholat. Ayeuna rék dimimitian deui. Léléngkah halu. Lilir tina
pagawéan anu nirca. Aya nu nyérédét kana haté. Lebah ngadéngékeun sora ”mugi
gusti nepungkeun abdi, sareng ibu rama
abdi”. Ya Alloh rumasa salila ieu tara pisan ngado’a
keur Ambu jeung Abah nu geus taya dikieuna. Lain taya waktu. Tapi haté geus kalimpudan ku dunya.
Enya kuring geus jadi budak tina dunya. Nepi ka mopohokeun ibadah. Inget kana
papatah Abah waktu masih jumeneng
sangkan tong poho sholat. Tapi mana
buktina?
Lalakon diri nu geus kasorang narémbongan. Piligenti. Kumaha ringkang jeung
talajak dina ngudag dunya sasat sagala
cara dilakonan. Teu inget batal haramna. Tunggul dirurud catang dirumpak. Proyék naon waé pasti dilakonan teu
paduli jalma masakat tingjarerit nu penting duit asup ka sorangan. Nu penting
dunya kapimilik. Ayeuna kuring geus jadi raja dunya. Tapi dunya teu bisa méré katingtriman kana diri.
Dunya
geus malindes ka diri sorangan. Buktina, katingtriman tina diri anggur ngiles.
Salilana diudag sieun jeung kamelang. Ayeuna kuring rék sayaga nyanghareupan
sagala hukuman nu rék ditibankeun. Moal susulumputan deui ti aparat. Seja
beberesih. Nyingkahan rereged dunya nu nalingkung, ngabakutet diri.***
Haturan:
Ambu Aam Amalia, tawis tineung ka grup 8
Tidak ada komentar:
Posting Komentar