Nu Miang ka Tanah Suci
Ku: Nina Rahayu Nadéa
“Bah,
ieu aya uleman.”
“Uleman
ti saha, Gum?” cekéng kanu jadi incu.
“Duka
da ti tukang pos.”
Kertas
ondangan diilikan. Warna bodas diadumaniskeun warna hideung pias lebah sisina.
Dina tengah ondangan ngajeblag gambar ka’bah. Di luhurna ditulis Undangan Walimatussafar. Panon maju ka jero
ondangan nu geus dibukakeun, néangan jalma nu boga kabagja bisa miang ka tanah suci. Ngalaksanakeun syukuran
pikeun pangjajap maranéhna saacan miang ibadah. Ngumpulkeun do’a ti sakabéh
jalma nu ngaluuhan acara. Do’a nu diharep mampuh ngalancarkeun sakabéh
kagiatan, ngajurung laku dina enggoning ngalaksanakeun rukun Islam nu ka lima.
Munggah haji. Nu teu sakabéh umat bisa
ngalakonan.
Tiap nampa ondangan samodél
kieu. Haté
teu weléh
gumeter. Mindeng cimata nyalangkrung dina kongkolak panon. Hayang mah hayang
indit ka ditu. Tapi ning can waé dikersakeun. Ari ngan saukur niat mah
geus aya. Geus sayaga ti béh ditu mula. Tapi lebah waragad. Haté kuméok. Waragad munggah haji nu mingkin nérékél
beuki méotkeun
haté
pikeun bisa miang ka ditu. Enya nepi ka kiwari, kuring can dikersakeun indit, nepi
ka boga incu reuay. Indit ka tanah suci ngan saukur aya dina lamunan. Matak sok
milu bagja ka jalma nu bisa miang ka tanah suci. Curuk hideng néangan
ngaran nu manggih kabagja. Paling handap kakara kapanggih. Undangan ti Mahmud, haté nyoara. “Alhamdulillah milik
gedé,
manéhna
bisa kabiruyungan ka tanah suci,” kuring nyusut cimata ku tonggong leungeun.
Cimata nu sok nyakséni kapeurih kuring tiap maca runtuyan kalimat dina
ondangan samodél kitu.
Inget Mahmud jadi rus ras ka jaman
baheula. Jaman kuring jeung manéhna babarengan basa keur budak.
Baheula waktu keur SD kuring jeung manéhna bareng. Saimah jeung nu jadi nini.
Ngan kitu ti baheula manéhna boga pasipatan nu
béda.
Pedit béak
ku sorangan. Sakitu ku nini sok sagala sarua dibéré dina urusan nanaon. Angger wé
manéhna
mah sok licik cilimit. Siga dina dahareun. Nu manéhna mah sok diteudeun tara
waka dipurak. Lebah kuring jeung adi-adi dahar bareng, manéhna
datang. Nyomot ti itu nyomot ti ieu.
“Buka atuh nu Kang Mahmud,” ceuk
kuring.
“Ah engké wé dan can hayang,” bari
leungeuna nyelemun kana awug nu adi kuring.
Kungsi dina hiji waktu kuring ménta
ka Mahmud jambu batu anu kacida meuhpeuy hareupeun imahna. Da kabeneran imah
manéhna
jeung imah nini pagigir-gigir.
“Euweuh aratah kénéh.”
“Ah itu ning geus asak,” curuk nunjuk kana jambu asak anu
kabeneran buahna rada handap.
“Ulah éta mah geus dicirian ku
babaturan. Ké
wé
lamun geus aya nu asak dibéré.”
“Nya atuh,” ceuk kuring bari haté
ngageremet.
Ditungguan ti isuk nepi ka buah nu
asak béak
geuning manéhna
teu méré
waé.
Padahal éta
jambu kacida dipikahayangna. Hayang seuri sakapeung mah lamun inget kana
kajadian harita. Bakat ku keuheul jeung ngageremet kana kalakuan Mahmud anu teu
méré
waé
jambu.
Kacaturkeun dina hiji waktu
magrib-magrib. Kabeneran nu di imah nini kitu deui imah Mahmud suwung, kabéh
arindit ka rumah sakit. Emang gering. Kuring sorangan di imah.
Térékél kuring naék
jambu batu. Tiap jambu ku kuring digegelan. Nepi ka anu ningali éta
jambu pasti nyangka yén jambu téh ku lalay. Jempling.
“Zen. Ka dieu lain hayang jambu,”
Mahmud ngagorowok ti pipir imah.
“Jambu naon?”
“Enya jambu téa.
Lain manéh
hayang?”
“Ning bageur ayeuna mah?”
“Na da kuring mah bageur,” sora ti
pipir kadéngé
tarik.
“Enya ké ka dinya.”
Bérés barang gawé
di imah nini, kuring nyampeurkeun manéhna. Niténan jambu anu geus arasak.
Ngan barocok siga anu ku lalay.
“Ning ku lalay?”
“Enya geus lah da moal nanaon.
Lalaki ieuh. Moal nepi ka buruk susu.”
“Keur kuring kabéh?”
“Heueuh top wé
ala.”
“Ari di dinya?”
“Embung ah teu beuki urut lalay
mah.”
***
Pleng, taunan teu nepungan ka Mahmud. Kahiji pédah
nu jadi nini geus teu aya dikieuna. Anu kaduana anu jadi matak tugenah nepi ka
tara silaturahmi ka manéhna. Pedah aya sangkéta. Sangkéta
anu dijieun ku manéhna sorangan. Patelak anu nyababkeun tali silaturahmi udar
tina simpayna. Bonganna, Mahmud ngahak kabéh bagian warisan tinu jadi
nini. Majar téh cenah kuring katut dua adi kuring teu boga hak nampa
warisan ti nini. Duméh saacan warisan di bagi, guar waris, indung kuring geus tilar dunya.
Mimitina mah kuring sadulur-dulur
keukeuh mertahankan hak. Lain ku hayang warisanna. Tapi kuring hayang kaaku kulawarga nini anu kacida dipikanyaahna. Tapi Mahmud keukeuh kana pamadeganna. Tibatan patelak
kuring jeung jadi dulur, mundur.
Ngan dina hiji waktu kungsi Mahmud
datang nepungan kuring jeung dulur-dulur. Intina hayang ngabebenar masalah rék ngabagi
rata hak warisan. Tapi basa dibalitungkeunan téh. Kénéh kehed beut untung di manéhna
rugi di kulawarga kuring. Lieur puguh gé,
komo jeung mamaké dalil agama sagala.
“Tos wé, Kang teu kedah nyabit-nyabit
deui éta
warisan. Hak abdi, bagéan abdi katut dulur dulur. Mugi kasaksén
ku sadayana. Ti wangkid ayeuna dugi ka jaga. Diwakafkeun kanggé
kapentingan masjid,” kuring mungkas obrolan.
Ayeuna kuring jeung Mahmud geus
cetuk huis. Geus puluhan taun teu tepung. Beunghar ku incu ti ditu ti dieu.
Remen kasono entreup na diri. Hayang nganjang ka sarakan nini. Tapi inggis
Mahmud teu suka. Inggis aya nanaon. Tinimbang patelak kanceuh deui, mending
kuring misahkeun diri.
Ayeuna kabéjakan manéhna
rék
indit ka tanah suci. Alhamdulillah. Ku umur, pasipatan manusa bisa robah, gerendeng
haté.
Dina émprona, dikersakeun teu bisa
indit. Entit, adi kuring dirawat di rumah sakit. Tapi isukna Entit nitah kuring
sangkan nepungan ka Mahmud nu rék miang ka tanah suci. Mudah-mudahan
ku ayana acara kieu. Bisa ngajadikeun silaturahmi manjang deui.
Isukna kuring jeung Jana, adi
bungsu kuring indit nepungan.
Diwawaas datang kanu dituju bakal
disayagikeun lalawuh anu biasa. Lalawuh keur tamu ti luar kota. Jajauheun
pisan. Datang ka ditu éstu disuguhan cai kaséhatan-cai bodas dina gelas bari
jeung teu diuyup, da dikobok ku incuna Mahmud nu keur meujeuhna leutik kénéh.
Jarijipen.
“Sok lah tah cai na diopi heula,
ngahaja ambéh
séhat.”
“Enya nuhun, Kang.”
“Hampura euweuh lalawuhna. Atuh
salah sorangan datang lain mangsa. Coba kamari ka dieu meureun nyampak sagala,”
walon Mahmud.
“Nyéta Entit gering. Jadi teu bisa
ka dieu,” ceuk kuring bari panon ngulincer ka kamar anu kahalangan ku hordéng.
Tiap hordéng
nyingsat katebak angin katangen ku juru panon; cau, ranginang, nyampak. Ah,
angger wé
geuning kékéd
méngkéné, haté galécok.
Kuring karék nyaho ti Maman, adi Mahmud. Basa
harita nganjang ka imahna. Yén Mahmud bisa ka tanah suci téh
ning ngajual tanah warisan téa. Tanah anu geus diwakafkeun ku
kuring. Ngageremet meureun haté Maman, da sarua gening manéhna teu kabagéan pisan hak tinu jadi nini.
Atuh sagala diobrolkeun.
“Astagfirullohal’adzim,” ngan kitu
nu semet kaluar tina biwir. “Ah, kuring mah geus teu ngaboga-boga, Man. Da ti
basa harita gé ku kuring geus diwakafkeun keur masjid.”
“Enya kuring gé
apal. Tapi da manéhna mah keukeuh wé ngarasa tanah anu sorangan. Antukna
dijual. Keun wé sugan moal jamuga.”
“Keun wé tong dipikran, geus karolot urang
mah. Geus kuduna mikiran bekel ka akhérat, lain ngagugulung nu karitu.
Anggursing urang mah syukuran ka Pangéran. Teu meunang warisan gé
ning teu burung urang séhat. Barudak calageur, sakola junun teu kakurangan. Atuh
kitu ogé
imah butut-butut waé mah pan baroga urang téh,” kuring ngupahan Maman.
“Enya lebah dinya na mah, Kang.
Tapi angger wé sok aya rasa keuheul dina haté.”
Teu lila nganjang téh.
Loba titingalian. Rus ras ka ditu ka dieu. Tiap amprok jeung dulur hayang waé
ngeupeulan. “Hayu ah urang balik,” kuring ngarérét Jana.
Paroman Mahmud katingali hégar
marahmay basa kuring amitan balik bari ngeupeulkeun amplop ka manéhna.
“Hampura Entit mah teu bisa datang
geuring,” kuring nandeskeun deui.
“Sing geura cageur kituh. Nuhun pisan
geus daék
nganjang, keun lah ké urang gupay di tanah suci ngarah di dinya bisa indit,”
Mahmud daréhdéh
nampanan amplop ti kuring.
“Amin.”
Sajajalan balik euweuh nu nyoara. Rénghap. Ambekan. Sadami. Silih
catur paguneman dina sawangan. Ngalalar silih tepungan panglamunan. Uteuk
kuring pagaliwota ngingetkeun lampah nu
rék
miang ka tanah suci. Enya nasib jalma béda waé. Sanajan cenah Mahmud bisa
indit tina ladang ngajual warisan tapi kitu meureun geus milikna. Baé téh
teuing kuma amal-amalanna. Kitu namah teunangan pisan. Los ka tanah suci
ninggalkeun masalah anu sakitu lobana. Ah, keun waé sugan di ditu téh
ki lanceuk meunang kabagja. Meunang élmu nu bisa ngabukakeun rereged hirup,
Jeroning haté
cumarita.
***
Keur anteng ngalengeu hareupeun
imah. Ti luar aya nu uluk salam. Dibukakeun téh Maman.
“Kumaha cageur, Man?”
“Alhamdulilah pangésto,
Kang.”
“Meunang kakarén
loba atuh meureun ti Arab?” kuring ngaheureuyan.
“Boro-boro, Kang. Kuring mah teu
dibéré
saeutik-saeutik acan. Nya apal lah kumaha adatna. Pédah meureun kuring teu
ngeupeulen basa rék indit ka Mekah.”
“Naha geuning éléh
ku urang dieu?” Entit datang bari nanggeuy baki. Sok kopi ngebul diteundeun di
hareupeun méja.
“Euleuh enya wé.
Nu teu ka Arab gé meuni ceuyah,” Maman rarat rérét kana opieun di luhur méja
nu ngabarak.
“Nya, sok wé atuh geura ngopi.”
“Ieu ah nu sunatna,” manéhna
ngarongkong kana korma. Celemun diopi siga nu nikmat. “Kasebeleun tah ka si
Deni, anakna Mahmud, piraku ngabagi kakarén ti Mekah wawaréhan.”
“Wawaréhan kumaha?”
“Enya anu teu méré
amplop basa acara syukuran rék ka Mekah da teu dibéré.
Dasar uyah mah tara téés ka luhur. Tamblég jeung bapak tabéatna.
Kopét.
Ceuk urang mah béré wé walatra. Jajauheun ka méré ka sakabéh
kampung. Kasebeleun.”
“Har...da ka dieu mah...” Entit
teu kebat ngomong basa kuring ngiceupan. Méré isarah sangkan jempé.
Entit surti.
“Untungna ngamaklum kétang
kanu datang kamusibatan.”
“Kamusibatan? Saha?” Kuring jeung Entit nanya méh
bareng.
“Enya Mahmud. Datang ti Mekah téh
teu mawa nanaon pisan. Uyuhan bisa balik ogé. Ngan tinggal baju dina
awak. Da kabéh barang jeung duit ledis teu
aya nu nyésa.
Cenah kacopétan.”
“Baruk, kuring mah karék
apal. Ari éta
geuning bisa babagi?”
“Éta mah barudakna wé
nu balanja di dieu. Kudu dipikiran sing asak-asak puguh gé, indit
ka ditu téh,
Kang. Mahmud gé di ditu na téh kalaparan waé. Mindeng tara kabagéan
dahareun. Tapi dikersakeun batur mah ceuyah dahareun kétang.”
“Matak kitu gé...,”
Entit teu kebat.
“Enya meureun. Kuma amal-amalan,”
Maman ngarahuh. Panon neuteup anteb ka lalangit imah.
“Ari Mahmud ayeuna kumaha, cageur?”
“Nyéta wales. Dirawat di rumah
sakit. Kaleleban ku duit nu leungit.”
*
Nina
Rahayu Nadea. Menulis dalam bahasa Indonesia dan bahasa Sunda. Tulisannya
dimuat di: Pikiran Rakyat, Galamedia,
Kabar Priangan, Majalah Kartini, Analisa Medan, Radar Bojonegoro, Majalah
Potret Banda Aceh, Majalah Baca Banda Aceh, Suara Karya, Suara Daerah, Majalah
Kandaga, Majalah Mangle, SundaMidang, Galura,
Tabloid Ganesha, Tribun Jabar, Koran Merapi Yogyakarta, Majalah HAI.
Tidak ada komentar:
Posting Komentar