Kalangkang Tresna
Ku Nina Rahayu Nadéa
“Pak.
Regu Beruang mah teu aya samakna.”
“Euh...
naha atuh pan geus diomat-omatan sangkan mawa. Saha ketua reguna?”
“Abi,
Pak.”
“Naha
teu ditugaskeun mawa samak?”
“Atos
Pak. Bagéan
si Basir. Ngan Basir na teu milu.”
“Sok
néangan
heula ka regu lain. Sugan aya nu mawa dua.” Ceuk Danu bari ninggalkeun barudak. Niat rék néang samak. Asa teu tenang
ningali barudak can merenah mah. Sakitu geus diomat-omatan mawa sagala rupa kaperluan.
Dina émprona,
angger waé sok aya nu
teu tungut kana panitah guru. Alesanna
poho téa,
bagéan
si anu téa,
kitu silituding. Antukna nya kitu, angger kabagéan riweuh. Kakurangan kaperluan
angger neumbleuhkeun ka guru, da biasana
kitu, sok dibantuan ku guru. Jadi asa ngeungeunaheun.
Bérés ngabebenah
ténda
keur barudak mah, balik deui waé ka ténda guru. Ngahiji jeung
guru-guru nu séjén ti sakola lain. Enya pan ieu acara téh
dina raraga maheutkeun silaturahmi sakola di tiap gugus. Lain ku acara pramuka
teuing. Ngan tambah teuing euweuh kagiatan. Kabéh sapuk, ngayakeun perjusami
babarengan. Nu intina lian ti budak jadi mandiri, heunteu ogo teuing atuh nu
lainna. Sangkan para guru jadi leuwih conggah. Da jeung enyana. Najan geus lila
ngajar, kurang apal ka guru anu aya di luareun sakola, sanajan enya sakola
tatangga ogé.
Jol
itu jol ieu silih tepangkeun. Angger wé geuning siga budak ngora, hareureuy
arocés
teu puguh. Poho kana kakolotan ari geus ngariung kitu mah.
“Eh,
geuning Pak Danu, kumaha damang?”
“Eh,
Pak Karman. Alhamdulillah.“ Danu ngarangkul Pak Karman sobatna.
“Kumaha
geus manggih can?”
“Manggih
naon?” Danu api-api teu apal ka mana loyogna caritaan.
“Éta
nu méncrang
téa.
Inget, karunya budak tah leutik kénéh, méh aya nu ngurus. Lamun nyaah
ka budak kitu gé.”
“Puguh
nyaah ka budak matak kikieuan téh. Sieun lah.” Danu seuri konéng.
“Leuh...
lalaki téh
euweuh kawani ieu mah. Batur mah ngabélaan poligami susulumputan. Ari ieu?
Hararésé
pisan.”
“Bisi
anak kuring aya nu ngulub. Indung téré téa atuh, pan geus loba
kacaritakeun.”
“istigfar.
Pikiran téh
tong nepi ka heureut kitu. Cicing di dieu nya. Ké aya babaturan... geulis.
Umurna sarua jeung di dinya. Parawan kénéh.”
Dijawab
ngan saukur ku seuri leutik, teu hayang némbalan. Danu nyarandé
kana tihang ténda. Nempokeun kagiatan barudak ti jauhna. Lambaran lalakon
narémbongan.
Ayu Ningrum, pamajikan Danu nu geus ninggalkeun, nepungan. Keur diajar
maheutkeun kaasih, nyulam rasa, diajar sapapait samanis dina sagara rumah
tangga. Hayang malikeun lambaran lalakon. Rumasa kacinta datang pandeuri,
sanggeus pamajikan ninggalkeun alam dunya. Nu ngaranna dirérémokeun,
kitu téa
taya cinta saeutik ogé ka manéhna.
Rumasa.
Anyaran kawin mindeng haré-haré ka Ningrum. Tara ieuh némbongkeun kacinta. Enya léah
sotéh
sanggeus si cakal gubrag ka alam dunya. Tapi lain cinta kétang,
karunya. Pédah
ku Danu sok diantepkeun. Karunya ningali pagawéanna dina ngurusan rumah
tangga. Ku soléhna nu jadi pamajikan. Sakitu tara dibéré budi béréhan. Sakitu haré-haré, lamun ngobrol. Manéhna
angger satuhu. Ngawulaan Danu nu jadi salaki. Sakitu Danu remen pisan balik gawé
peuting. Diwalah-walah Ningrum geus ngaguher. Barang datang téh
nyampak keur cungelik. Ningali salaki datang, cakah cikih nyiapkeun cai. Teu
kalis ku kitu. Danu dipikanyaah alah batan ti budak leutik. Pakéan
keur gawé
geus nyampak, tinggal rap, sapatu meunang nyemir. Teu sirikna dikaos kakian téh,
lain bohong. Mimiti mah ragap tapi lila-lila mah biasa wé, malah asa kangeunahan.
Sakali euweuh Ningrum dunya asa kiamat.
“Hapunten
nya, Kang, teu tiasa ngawulaan nu
langkung.” Dina hiji poé Ningrum nyarita waktu Danu rék indit gawé.
“Teu
nanaon, Rum anggur akang ménta dihampura salila ieu ngariweuhkeun waé.
Geus tong baranggawé waé. Da aya ieuh Bi Jumi. Ngahaja ku akang didatangkeun, méh Ningrum
soson-soson ngurus budak.” Danu neuteup budakna, anu umur 2 mingguan. Neuteup
pamajikan seukeut. Katingali beungeut pamajikan anu kanyos, pias, capé
barang gawé.
Deudeuh Ningrum, gerentesna.
Budak
mingkin gedé,
mingkin getén
ngurusna. Euweuh pisan cedana boga pamajikan téh. Tara loba piomongeun, sumawona
loba paménta
mah. Atuh tabungan geuning boga waé, sanajan saeutik gé.
Rikrik gemi, moal aya duana wéh pamajikan téh.
Kabagja
beuki nambahan waktu Ningrum ngandeg ku budag ka dua. Komo barang nyaho jabag
bayi nu dikandung teh awéwé. Jangkep kabagja geus aya na kongkolak panon. Geus
nganiatkeun dina haté Danu rék diajar micinta Ningrum. Tapi ning
harepan jeung cita-cita nu geus diuntun téh sulaya. Bumi alam nangkub
sapada harita. Waktu dina brolna si utun, Ningrum dipundut kunu kagungan.
Remen
nyalahkeun diri sorangan. Kaduhung lain bobohongan. Kaduhung cinta datangna leuir. Naha teu ti baheula ti barang ijab kabul.
Dosa asa mahung dina diri, inget kana kasalahan anu enggeus-eunggeus. Matak kitu gé aya hikmahna, Danu kudu ngarasakeun kumaha
peurih jeung riweuh ngurusan nu jadi budak. Ti dinya ngayakinkeun diri, yén moal deui boga pamajikan. Cukup na haténa
aya ngaran Ningrum.
Kolot jeung baraya nitah Danu néangan
pamajikan. Babakuna karunya ka barudak anu keur meujeuhna urusaneun. Tapi nya
kitu, dina ayana anu ngarérémokeun angger nu jadi bahan babandingan téh
taya deui iwal ti Ningrum. Ti tingkah laku, nepi ka rupa teu sirikna néang
nu siga jinisna. Antukna nepi ka ayeuna, nepi ka si bungsu asup ka TK angger wé
nyorangan. Sanajan loba anu ngajodokeun gé, tara ieuh dirérét.
“Tah
Pak Danu, nu bade kenalan téa.” Pak Karman norojol diiringkeun ku
hiji awéwé,
tukangeun.
“Rani?”
“Kang
Danu?”
Dua
panon siliteuteup, lambaran lalakon baheula narémbongan.
“Ning
geus wawuh. Halah ari geus kitu mah babari. Tinggal ngajadikeun waé.
Sok ah ka dinya atuh teruskeun ngobrolna.” Pak Karman ngaléos teu nunggu jawaban Danu.
“Eu...
geuning kenal sareng Pak Karman?” Tanya Danu sanggeus sababaraha lila
pabetem-betem.
“Pan
sami ngajar sareng anjeunna.”
“Kutan?
Sanés
kapungkur téh
di Cianjur?”
“Tos
mutasi.” Walonna pondok.
Jep
sabaraha lila jempling.
“Kang
Danu, hapunten Rani kapungkur,” sorana dumareuda. “Rumaos teu tigin kana
jangji, keuna ku owah gingsir. Beut teu nyangki anjeunna tos rimbitan. Nya kieu buktosna dugi ka ayeuna
Rani nyorangan kénéh, mun harita sareng akang mah panginten....”
“Ah,
tos tong ngemut nu kapungkur pamali...” Danu neuteup Rani. Dua panon paadu teuteup.
Dina panonna kagambar Rani jeung budakna anu keur meujeuhna. Kagambar waktu
babarengan jeung Rani. Ti SMP kénéh bobogohan nepi ka kuliahna.
Ngan édas
manéhna
beut kapincut ku hiji lalaki PNS waktu
keur PPL di hiji sakola. Teu bisa majar kumaha, rumasa harita masih kuliah.
Can bisa ngabuktikeun yén sanggup
ngabagjakeun.
Ampir
wé
kuliah mandeg, bakat ku kabungbulengan
ku Rani. Kuliah embung, da sieun panggih jeung manéhna. Rumasa gedé kénéh
duriat. Tinimbang ngabatin, kapaksa cuti heula nungguan Rani bérés
kuiah. Geus yakin manéhna bérés mah. Ku pangrojong ti saréréa. Alhamdulillah kuliah bisa réngsé,
jeung milik gedé, langsung diangkat jadi PNS. Pleng wé
tara ngadéngé
kelemengna ngaran Rani. Ngan ceuk béja
cicing di Cianjur.
“Pak.
Si Oji leungeunna getihan...” budak ngagorowok nyampeurkeun Danu.
“Leuh,
kunaon? Sok ka dieu bawa.”
Parigel
Rani ngumbah leungeun nu getihan, diberesihan deui maké alkohol, teu poho bétadin.
“Wios
ku akang diperbanna.”
Leungeun
teu ngahaja antel jeung Rani. Sssrrr aya nu sumarambah kana haté.
Neuteup deui manéhna leleb. Belenyéh imut. Langit cangra narawangan,
kalangkang tresna nyalampeurkeun, mapag
rasa nu nyaliara. Sayaga ditampa.***
Tidak ada komentar:
Posting Komentar