Daging
Qurban
Ku
Nina Rahayu Nadéa
Ima, awéwé geulis nu kacida dipuja ku
loba pamuda. Campernik tur nyakola luhur. Atuh dina pakéanna salilana teu weléh up to date. Gaul. Ti mimiti lénsa
mata, béhel, kitu deui perangkat tékhnologi
samisal HP, tara tinggaleun jaman. Cirining wanoja gaul jeung masa kini. Teu anéh
lamun Danil kapéngpéongan ku kageulisan jeung dangdanana. Kaparengkeun Ima teu
nolak cinta Danil, nu kabeneran sarua siga manéhna, gaul jeung masa kini.
Atuh layeut kamamana. Da sakaresep.
Shopping, karokéan,
dugem, geus biasa. Ngan hiji anu teu sahobi jeung Danil. Nyéta
karesep Ima kana daging domba. Teu sirikna lamun Ima manggih daging domba, poho
kana sagala rupa. Komo mun palebah manggih tulangna teu sirikna dikecrokan.
Ngarah kaarah sumsumna, da cenah éta
nu kacida nikmatna. Poho lamun manéhna
keur bareng jeung nu lain. Andalemi leungit. Langsung ngahékak
daging nu aya hareupeun. Ieu nu sabenerna teu dipikaresep ku Danil.
“Piraku geulis-geulis seneng
daging domba.” Kitu mun Danil nyindiran ka Ima.
Dina runtuyan kulawargana, ngan Ima nu kacida resep kana daging domba. Nu lain
mah teu pati. Komo kolotna mah geus lila tara ngadahar dadagingan. Dipahing
asana téh.
Geus kolot mah nya kitu téa babari katerap
panyakit. Sasat teu diondang gé, sakadang kasakit téh
nyalampeurkeun. Matakna geus tara
ngadahar dadagingan. Komo deui daging domba anu nyababkeun kolestérol ngaluhuran. Tapi kangaranan
pangaresep, hésé pisan ngaleungitkeunna. Najan enya ayeuna mah rada
dieurad. Mun tepung jeung Danil mah tara barang tuang daging domba. Enya kitu diajar andalemi
hareupeun. Sanggeus dicaritaan mah. Tapi disatukangeun mah. Angger....
Kungsi dina Idul Adha taun
kamari mah. Daging qurban beubeunangan téh dibagikeun
deui ku indungna. Agkeuhanna, da loba ieuh daging sapi méh kabéh bisa ngariung balakécrakan.
Tapi na atuh, Ima nu geulis rancunit téh
ngagadeud waktu apal daging dibikeun ka tatanggana.
“Tos wé da seueur ieuh daging mah. Tuh
dina kulkas.” Ceuk indungna ngalelemu kanu ambek.
“Alim.... nanaonan daging sapi.
Ima mah teu resep. Hoyongna gé
daging domba!”
Kusabab murang maring jeung buad
baeud waé
kanu aya di imah. Kapaksa indungna meuli daging keur hancengan Ima. Da enyaan,
dihékoy
ku sorangan. Geus apal kana adat budakna
mah, ti dinya tara ieuh tual toél sumawona wani ngabagikeun kanu lain.
Atuh dina nyanghareupan Idul Adha téh, Ima tingtrim, lantaran tara
aya nu ngahalangan kana kahayangna.
Qurban domba taun ayeuna ceuyah. Atuh kitu deui kulkas di imah metet ku daging. Dipasak wé
unggal poé
ku Ima euweuh ka bosen. Waktu apal kabogohna rék nganjang ka imah jeung
pimitohaeun téh, harita Ima keur masak daging domba. Ditongséng
siga karesepna.
“Sanes bade énjing?” Ima nanya ka Danil dina telepon.
“Uwa nu di Bali. Uihna badé ké wengi. Jadi wayahna
dipajukeun ayeuna.”
Poho kana papatah kabogohna
waktu ningali daging domba ngagupayan tina katél. Seungitna nyambuang, ngajak
beuteung Ima pikeun dadahut. Teu ngalilakeun deui. Langsung ngalas sangu jeung daging domba téa.
Ngahimel nakeranan. Mindo na gé
teuing sababaraha kali bakat ku nikmat. Pareng manggih daging anu liat. Digégél
satarikna bari jeung dibetot.
“Haduh!” Ima ngagéréwék.
Laju jeung ngaclengna daging domba ka lawang panto anu kabeneran muka.
“Euleuh naon ieu téh.”
Daging domba keuna pisan kana tarang Danil, anu harita ngelol ti lawang.
“Kunaon ari Ima. Auh... auhan
kitu.” Indungna nyampeurkeun kanu keur uyek-uyekan.
“Kunaon, Ma?” Danil sarua
nyampeurkeun. Ari Ima? Angger nungkupan biwir bari jeung ngarasakeun kanyeri.
“Cing ninggali. Teu kua-kieu?”
“Teu, Mah. Haduuuh....” Ima
humarurung.
“Heunteu kumaha, sakitu
humarurung.” Sok énggal, Dani jeung indungna maksa.
Barang bréh.... Indungna kitu deui Danil
seuri.
“Mamah mah ngadon gumujeng ning. Ningali Ima téh.
Ieu, panglereskeun heula behél coplok.”
“Sok wé ngaca heula ka ditu.”
Teu talangké Ima
ngaca. Bréh...
dina behélna
rapang ku ceuhil daging domba, jaba behélna nyuay sabeulah hésé
menerkeuna.
“Haduh Mah, kumaha ieu téh
jabaning behél
enggal. Awis ongkohanan.” Ima rawah riwih ceurik. Nyeri kacida. Pangpangna
nyeri haté, kanyahoan ku Danil.***
Tidak ada komentar:
Posting Komentar