Ajen Guru Jaman Kiwari

Dimuat di Majalah Mangle No 2518, 12-18 Maret 2015.

Mimbar Atikan

Ajén Guru Jaman Kiwari

Ku Nina Rahayu Nadéa

                Lobana kasus  anu nyababkeun guru kudu urusan jeung aparat geus jadi kasieun anu pohara keur sakabéh guru. Keur jaman ayeuna lain hal anu mustahil budak ngalaporkeun guruna pédah ngalakukeun hal anu ceuk urang teu pira. Lain teu pira kétang, tapi meureun sakuduna dina hal nanjeurkeun disiplin, tapi nyababkeun  guru jadi kabaud jeung urusan hukum. Contona waé lantaran nyukuran budak, geus puguh ari nyiwit atawa neunggeul budak mah.  

                Teu ngabibisani jadi guru jaman kiwari loba pisan godaan anu  nyababkeun getih naék, jeung piambekeun. Geus kaujur, kumaha tabéat barudak jaman ayeuna. Kacida bédana jeung  jaman baheula. Sedengkeun di sisi séjén tindakan guru kacida heureutna, loba aturan anu   asa ngiket, teu merdika siga baheula. Teu kitu kumaha kalakuan guru ayeuna teu weléh jadi sorotan. Jadi paneumbleuhan lamun aya  kasalahan. Salah saeutik, wartawan, LSM pon kitu deui Komisi Perlindungan Anak Indonesia ngurunyung.

                Anu matak ngusap dada jeung matak bangbaungeun kacida téh perkara nindak atawa méré sangsi ka murid. Lamun enya kaleuleuwihi atawa méngpar tina aturan sakola mah, meureun baé téh teuing. Da jeung enyana, sakuduna lamun aya guru anu ngalanggar sarta nindak muridna kalawan jeung teu adeuh mah wajib ditindak. Tapi lamun lantaran hal anu teu pira, anu ceuk kamandang guru mah pikeun ningkatkeun kadisiplinan, pikeun ngubah kalakuan budak anu badeur jadi bageur. Naha éta salah?

                Nu jadi anéh jeung matak salah ka guruna loba murid nu misalna waé disentak atawa diciwit langsung bébéja ka kolotna. Sarta nu matak teu ngeunah téh geuning loba kolot budak anu guguan ka budak sarta langsung ngontrog ka sakolana.  Ceuk ijiran moal aya guru anu nyentak atawa nyiwit teu pupuguh ari lain guru nu sedeng mah meureun. Tapi dalah da dikumaha, gening kitu kanyataanna. Lamun anu datang kolotna ngarti jeung narima kana kajadian anu tumiba, alhamdulillah. Nu matak lewang, loba kolot anu keukeuh teu nampa budakna diciwit sarta langsung ngalaporkeun ka polisi. Matak leuwih muringkak bulu punduk lamun dina pamustunganna angger guru nu disalahkeun.

                Sok ngalamun ka mangsa nu baheula mangsa keur jaman sakola. Guru baheula kacida garalakna. Nerapkeun disiplin kacida beuratna. Lain hiji dua  murid nepi ka dicabok.  Tapi barudak angger ajrih, mihormat kanu jadi guru. Moal aya nu wani bébéja ka kolot pédah geus dicabok, sakalieun aya nu pangangguran bébéja gé, anggur dicarékan deui ku kolot, majar teu merhatikeun guru. Teu anéh lamun barudak jaman harita disiplinna kacida alus sarta mihormat pisan kanu jadi guru.

                Ari jaman ayeuna? beu... beu...  enya beuki muringkak bulu punduk puguh gé. Ajén guru jaman ayeuna sigana geus turun. Budak geus teu aya kaéra ka guru, rasa hormat geus luntur. Kitu deui loba guru anu sigana téh euweuh sekat jeung budak, komo deui meureun ku kurikulum 2013 mah. Pan guru téh kudu ancrub, naluntik perkara kaayaan budak, boh tina segi sosial, spiritual jeung nu lainna. Da lamun guru haré-haré wae mah meureun lebah penilaian anu saubrug-ubrug téh moal kapeunteun.

Teundeun heula perkara penilaian anu sakudunan dilakukeun ku guru. Tapi perkara ajén guru jaman kiwari, memang kacida pagedrugna.  Di sisi séjén guru kudu deukeut jeung budak, naluntik budak méh bisa nganilai budak sacara bener. Di sisi séjén budak bet asa calutak, asa dibéré haté.

                Lantaran sieun tijalikeuh kana hal anu goréng téa. Loba guru nyieun prinsip ‘aman-aman saja’ ngalakukeun hal-hal asal barudak bungah, atuh teu anéh meureun lamun kadieunakeun guru beut jadi tungut kana kahayang budak. Ngéléhan. Tong jauh teuing, Misalna waé  dina nyieun kelompok  diskusi. Loba budak anu arembungan sakelompok jeung hiji budak anu baong, jeung teu sapagodos jeung kahayangna.   Alesanna galak téa, sok neunggeul téa atawa tara ngerjakeun tugas. Nya tinimbang budak ngarasa teu nyaman jeung  teu ngahasilkeun, tungtungna mah dienyakeun waé.

                Atuh kitu deui lebah nindak barudak anu baong atawa ngeselkeun guru. Tambah teuing heunteu, ngan saukur mamatahan nepi ka ngabulaéh bari jeung hasilna mah nya kénéh-kénéh. Kitu-kitu waé. Geus kajudi budak mah ngan saukur enya-enya hareupeun, satukangeun mah meureun kuma aing waé.  Da lamun nepi ka adu pisik mah geus kajudi naon pibalukareunna. Nu matak teu anéh lamun beuki dieu, budak teu euih-euih.

                Undang-undang Guru jeung Dosen No 14 tahun 2005 pasal 1 ayat 1 nyebutkeun: guru adalah pendidik profesional dengan tugas utama mendidik, mengajar, membimbing, mengarahkan, melatih, menilai, mengevaluasi peserta didik pada pendidikan formal, pendidikan dasar dan pendidikan menengah.  

                Geus kajudi sabenerna. Yén ngadidik budak téh lain ngan saukur ngadidik budak sangkan jadi jelema pinter. Tapi nu utama ngadidik budak sangan leuwih berakhlak. Komo tuntutan dina kurikulum 2013 nilai atitude (sikap) kacida pentingna.  Tapi ngabandungan loba kajadian, bingung teu manggih tungtung. Kudu kumaha ngungkulanna. Jadi lamun aya  budak anu baongna kaleuleuwihi  api-api  teu nyaho waé kitu?***

*Mugia seueur pulunganeun :)