Carmis
Nu
Ngajak Balik
Ku:
Nina Rahayu Nadéa
Bati
ngemplongna sanggeus boga imah. Dibeuli lunas taya hahalang. Pon kitu deui pamajikan katingali paromanna béar
marahmay. Kitu pasti, sasat imah kahayang. Ngabélaan ngirit dahar, medit ceuk
nu lain mah demi nu dipimaksud. Sapuluh taun rumah tangga karék
ayeuna diijabah ngimahan nu jadi anak pamajikan.
Harita
kénéh
langsung dieusian. Parabot ti imah kontrakan langsung diangkut dipernahkeun.
Ngan édas.
Kabagja téh
geuning beut sajorélat. Imah anyar téh beut dipaké titirah kunu jadi pamajikan.
Sababaraha poé tisaprak dicicingan. Pamajikan brek gering, ngareunggeuy.
Nu tadina gesit, singset kana barang gawé,
jadi lénglé.
Malah sok katangen keur ngalamun. Digebah atawa ditanya aya naon? Dijawab ngan
saukur ku gideug. Atawa lamun diguliksek cukup ku ngajawab “Teu aya
nanaon”. Beuki dieu beuki remen huleng
jentul. Siga nu jarauh panineungan. Malah suda kana barang dahar. Atuh anu
tadina awak lingsig montok beuki dieu
beuki ngabegangan.
Sababaraha
dokter geus didatangan sangkan bisa ngubaran
jeung ngaleungitkeun panyakit anu tumerap ka pamajikan. Tiap datang dipariksa
malah kungsi nepi ka dirongsen. Tapi keukeuh ceuk dokter henteu aya nanaon.
Ngan cenah loba pikiran waé, jeung kurang istirahat. Kitu jeung kitu tiap datang ka
dokter téh.
Tapi pamajikan angger taya béragna anggur beuki dieu beuki regung. Awakna laleuleus, lungsé.
Kitu pantes atuh da teu kaeusian dahareun.
“Tong
loba pikiran atuh, Mah. Pan imah alhamdulillah geus boga, teu kudu ngontrak
deui. Anggur mah kudu loba sukuran.” Ceuk kuring satutas solat Isya bari mencétan
pamajikan anu ngalempréh
dina kasur.
“Teu
aya nanaon da.” Témbalna halon. Tina juru panon aya nu nyalangkrung.
“Teu
aya nanaon kumaha. Geuning siga ngemu kasedih?” Kuring nyeleksek.
“Duka
atuh, Pa. Teu pararuguh waé haté téh...”
“Matak
kitu gé aya nu dipikiran. Aya naon atuh?”
“Asa
teu betah puguh di imah téh.”
Pamajikan ngomong halon.
“Teu
betah pantes atuh, Mah. Da imah anyar. Ningalkeun kontrakan anu ampir 10 taun
dicicingan ku urang. Ké gé betah geura.
Anggur jalan-jalan ka luar. Ka tatangga anyar. Hayu ku Bapak ké
dianteur.”
“Enya
kahayang mah, Pak. Ngan kumaha atuh. boro-boro ka luar, pan ka cai ogé
sasat laleuleus kieu.” Pamajikan tambah halon. Semu beurat keur ngomong.
“Enya
tos wé
istirahat. Sugan isuk géto mah jagjag.” Kuring
nyimbutan pamajikan.
Kuring
neuteup pamajikan leleb. Enya teuing naon atuh panyakitna. Uubar mah pan geus
puguh ka ditu ka dieu. Tapi can aya waé hasilna. Nu puguh mah duit béak,
pamajikan angger tiktik brek. Asa mending siga baheula, ngontrak. Ngariung jeung
anak pamajikan bari jeung hirup pinuh ku
kabéragan.
Ari ayeuna? Enya ogé imah sorangan tapi tiiseun pisan. Pamajikan taya
menyatna, atuh budak dua kapaksa dititipkeun ka ninina da kaayaan pamajikan anu
sakitu buktina.
Hiji
poé
satutas berobat ka dokter. Nyimpang
heula kanu jadi indung. Pangpangna mah geus sono waé ka barudak. Ampir saminggu
teu ditempo.
“Mamah!”
Nu leutik langsung muru ka indungna. Kitu deui anu gedé.
“Cicing!
Mamah... Mamah!” Pamajikan nyentak. Budak ngarengkog, rét ka kuring.
“Ké
mamahna capé
kénéh.
Jeung pan Mamah téh teu sehat.” Kuring nyarita kanu jadi barudak, basa
ningali talajak pamajikan, siga nu keuheul waktu dideukeutan ku barudak. Taya
rindat kasono saeutik ogé sakitu teu tepung lila. Padahal manéhna
sorangan nu keukeuh hayang nyimpang ka dieu. Sono ka barudak cenah kitu omongna
ka kuring.
“Enya jig ka ditu arulin geura. Keun sina istirahat
heula mamahna.” Tembal indung kuring surti. “Di dinya wé, Dan tah golérkeun.”
Indung kuring nuduhkeun kana kasur.
“Sok
istirahat heula, Mah.” Ceuk kuring ngusap tarang nu jadi pamajikan. Banget ku deudeuh jeung karunya ningali warugana.
“Geus
tong kikieuan geuleuh.” Pamajikan ngépéskeun leungeun kuring nu keur
ngusapan.
“Ku
naon, Mah?” kuring reuwas ningali pamajikan kitu. Asa anéh puguh gé. ”Mah?”
Kuring neuteup pamajikan.
“Naon...
Mamah... mamahan?” Panonna ngaburileng.
“Dila...
Dila...” Indung kuring nyampeurkeun. Reuwaseun.
“Lain
Dila kuring mah lain.... Hahaha.” Sorana bedas semu ngagerem. Kukurayeun. Lain
sora Dila pamajikan kuring.
“Ma?”
Kuring ngareret kanu jadi indung.
“Geuwat
susul Ustad Acéng.”
Kuring
surti. Teu talangké
langsung muru imahna nu kahalangan ku sasuhunan.
“Pangmawakeun
heula cai, Dang.”
Song
kuring mikeun cai ka manéhna.
“Kaluar
sia, kaluar! Rék nanaonan manéh ka dieu.” Pamajikan nunjuk Ustad Acéng nu keur anteng babacaan.
Teu gidir. Teu kahalangan kunu nyarékan.
Ngarasa
diantepkeun jeung teu dianggap. Jung pamajikan nangtung, niat rék najong
Ustad Acéng
nu aya hareupeun, lamun kuring teu geuwat nyekelan mah. Pamajikan dicekelan ku kuring.
Ampir teu katanagaan lamun teu dibantuan ku tatangga anu rabul nyalampeurkeun
mah. Awak pamajikan diborogod ku sababaraha urang.
Bérés
Ustad Acéng
ngadoa. Manéhna
neuteup leleb panon pamajikan. Laju leungeunna ngéprétkeun cai kana beungeut pamajikan.
“Sadar,
Dila.”
“Sadar...
sadar. Ustad gejul aing mah lain Dila. Aing mah kabogoh Dila nyaho teu?”
“Oh
kabogoh Dila. Enya sok atuh ka luar. Tong cicing dina waruga Dila, mun enya
andika bogoh mah karunya....”
“Moal...
moal nyingkah kuring mah. Puguh ngahaja ka dieu téh rék ngajak balik. Karunya di imah
mah ruwet. Moal senang. Mending jeung kuring waé bakal disenangkeun.” Sorana angger
handaruan.
“Teu
bisa disabaran nya. Sok indit!” Ustad Acéng ngised. Marancahan anu keur kasurupan. Ti mimiti indung jempol
dicekel, mapay ka luhur. Sakapeung pepeta, tihothat. Leungeunna gasik nyekel ka hiji tempat anu aya dina awak, siga nu keur aya nu diburu.
Dicekel pageuh. Sarta geus kacekel. Gegereyeman laju ngaheumbatkeun leungeun ka
nu lain siga aya nu dipiceun.
“Moal
nyingkah. Aing mah geus betah di dieu...” Sora pamajikan beuki bedas.
“Istigfar Dila. Istigfar. Sok sing
kuat. Ulah kabawa ku sakaba-kaba. Urang makhluk nu paling mulya.” Ustad Acéng
nyimbeuhkeun cai kana beungeut pamajikan terus diusap.
“Istigfar,
Mah.” Kuring sarua ngélingan.
“Astgafirulloh.”
Sora pamajikan lumengis. “Moal... ingkah!“ Sora bedasna kaluar deui.
Kitu
jeung kitu sababaraha menitan mah. Nu kaluar sora téh piligenti. Kadang sora Dila
pamajikan kuring kadang sora lalaki handaruan pikasieuneun.
Nu
araya teu éléh
géléng.
Kabéh
hémpak
maca surat sabisa-bisa. Ustad Acéng beuki khusu ngadoa ka
mantenNa.
“Kuring
bakal datang deui... Dila pamajikan kuring.” Sora lalaki handaruan ngiles. Laju
jeung awak Dila anu ramohpoy ngadupruk dina kasur lir dipupul bayu. Sababara
lila kapidara. Diceuhceuhan ku indung kuring.
“Sadar,
Mah?” Ceuk kuring waktu ningali pamajikan beunta.
“Mana
si Dédé,
Pak? Teu nanaon?” Panonna neuteup kuring.
“Keur
ulin jeung lanceukna. Tos sadar, Mah?” Kuring nanya deui kanu jadi pamajikan.
“Sadar
naon, Pak? Da teu nanaon. Euleuh geuning seueur tamu kieu.” Pamajikan rungah
ringeuh karék
sadar kana kaayaan.
“Sukur
tos sadar mah Dila. Yeuh eueut deui
caina.” Ustad Acéng ngasongkeun cai.
Regot
pamajikan nginum cai nu diasongkeun.
“Aya
kénéh
nu karaos beurat?” Tanya Ustad Acéng.
“Ieu
asa aya nu ngabeuratan.” Leungeuna nunjuk punduk.
Ustad
Acéng
kunyam kunyem. Kadua leungeunna nungkup naon anu dituduhkeun. Lung dialungkeun.
“Insya Alloh moal nanaon deui.” Ustad Acéng
ngarénghap panjang.
“Aya
naon nu saleresna ieu téh Ustad?”
“Tos
lami nyalikan bumi anyar?” Ustad Acéng malik nanya.
“Aya
kana 4 sasih mah.”
“Kumaha
tos dieusian karaosna.”
“Ari
abdi mah biasa waé. Mung Dila puguh gé. Tisaprak ka ditu teh anggur tiktik
brek, teu damang waé. Uubar mah ka ditu ka dieu ngan angger teu menyat waé.”
“Eummm.”Ustad
Acéng
unggut-unggutan.
“Ari
kitu kumaha, Pak?”
“Manéhna
asa kaganggu kunu anyar datang. Asa kalindih. Komo deui teu amitan. Keuheul.
Treup waé
ka tuang istri anu lengah, nu nuju seueur émutan.”
“Nyéta
ditalék
aya emutan naon gé. Keukeuh teu betus pun bojo téh.” Kuring ngarérét
ka pamajikan.
“Ah.
Tos tong dipikiran. Nu pasti di mana waé
urang kudu getol ibadah. Haté
tong lengah. Kudu percaya di sakuriling urang téh aya makhluk nu lain, anu
salilana ngaganggu manusa anu teu éling ka mantenNa.”
“Kumaha
atuh ayeuna, Ustad?”
“Urang
beresihan heula imahna. Beresihan ku doa. Ménta idin kanu aya, sangkan
inyana teu kaganggu, teu kagiridig ku urang. Jadi bisa dieusian kalawan dina
katengtreman.”
“Moal...
moal balik deui ka imah horéam. Komo panggih jeung tatangga
gigireun mah. Cadu, Pak.“ Pamajikan
ngagukguk.
“Aya
naon, Mah?” Kuring nanya semu reuwas.
“Manéhna
ngambek teu pupuguh. Pédah
asa diteungteuingan. Imah téh geus dipanjer kanu bogana
satengahna. Pas rék ngalunasan, kari-kari duitna dibikeun deui. Da cenah
geus dibeuli ku urang. Tiap panggih teu weléh sindir sampir, majar kuring neluh
no boga imah nepi ka antukna imah bisa kapimilik. Mamah embung.... embung rudet, Pak. Jual deui
wé
imah téh.”
Pamajikan beuki ngagukguk.
“Tah
geuning éta
panyakitna.” Ustad Acéng seuri koneng.***
hhhh
Tidak ada komentar:
Posting Komentar