Rénghap Angin
Ku Nina Rahayu Nadéa
“Aduh,
Ma. Nyeri!” Kuring ngajerit rada dipengkek. Kahayang mah ngajorowok tarik
bakating ku nyeri. Ngan masih aya kaéra. Pan kuring keur aya di rumah bersalin.
“Sabar…
sabar. Anggursing mumuntang ka Gusti.”
Ema ngusapan buuk kuring, kalawan
deudeuh.
“Énggal,
Bu. Ngaheujeun deui. Sakedap deui orokna kaluar.”
“Tos
teu kiat abdi mah, bu bidan. Ema tulung, Ma.” Kuring ngaramesan leungeun Ema nu
aya di gigireun.
“Sok
pasti Éla bisa. Buru sakeudeung deui budakna kaluar, tuh buukna gé geus
katingali.” Ema nyumangetan kuring.
“Ma,
na nasib Éla téh beut kieu atuh, Ma. Éla mah enyaan teu ngaharepkeun ieu orok.
Mending pondok umur orok téh, Ma.”
Lamun
kuring bisa malikeun lalakon meureun kuring téh moal daék indit jeung Grasél
babaturan sakelas kuring. Ngan pédah wé Dina sobat kuring teu asup kuliah
harita téh. Jadi kapaksa ngumaha ka Grasél.
Basa inget yén tugas Pak Maulana kudu dikumpulkeun dua poé deui, sedengkeun
kuring teu boga buku sumberna.
“Sél,
tiasa teu Éla nambut buku Manajemen Keuangan?”
“Aya
ngan di kosan.” Grasél imut. “Hayu atuh ari rék ka kosan Grasél mah da teu pati
jauh ti dieu.”
“Asiik
aya nu nulungan.”
Satutas
kuliah kuring diboncéng ku Grasél kana motorna.
“Heuleuh
meni énakeun kieu tempat téh, Sél? Lega deuih.” Ceuk kuring rarat rérét. Abong kuring jarang iinditan Tara pirajeunan ruang rIung jeung nu lain. Sakalieun
nungguan dosén asup lamun aya waktu panjang gé, paling kuring mah nungguan wé
di masjid. Atawa paling ngerjakeun tugas
di taman, hareupeun kampus jeung Dina. Ngan sakitu. Bérés kuliah mah sok langsung
wé ka imah Uwa. Sipat Uwa nu heuras tur
disiplin dina ngadidik anak-anak teu ngabédakeun ka kuring sanajan anak adina.
Kaharti
kitu namah. Uwa téh sieuneun barudakna ogé kuring nu sasatna budak titipan, kabawa kusakaba-kaba. Mun aya nanaon
téh pan angger meureun Uwa nu kateumbleuhan.
“Alhamdulillah
Éla antukna daék cicing di dieu. Uwa mah atoh wé nu aya, aya batur Lina, anak Uwa
méh aya nu merhatikeun. Babakuna mah Uwa istri méh aya nu mantuan deuih. Ngan wayahna
cicing jeung Uwa mah kudu tungut. Teu meunang ubrang abring sumawona ulin teu
puguh. Lain nanaon, La. Kudu bisa ngabédakeun
cicing di lembur jeung di kota. Matak kudu ati-ati pisan.” Uwa pameget nyarita
panjang lébar basa kuring karék datang ka imahna.
“Tuh,
regepkeun tah cariosan, Uwa.” Ceuk Ema.
Dijawab
ngan saukur ku unggek.
Kuring
bungah pisan basa disambat ku Uwa pikeun kuliah deui. Malah biaya jeung sagala
gé ditangkes ku Uwa. Karunyaeun meureun ka Ema nu hirup nyabeulah.
Ngan
teu kuhanteu keur betah-betah sakola. Betah nyuprih élmu beut kagoda kunu
lain-lain. Enya mimitina mah basa datang ka kosan Grasél téa. Kabeneran di dinya téh aya hiji lalaki nu kabeneran keur nungguan Grasél.
Malah kacirina mah maranéhna geus alakrab pisan.
“Tos
tatadi ?” Tanya Grasél.
“Lumayan
lah.” Cenah bari ngarérét ka kuring. Belenyéh imut.
Kuring
tungkul asa éra diteuteup ku lalaki anyar pinangih. “Oh, ieu temen kuliah Grasél.
Éla.” “Baim.” Cenah, bari jeung nyodorkeun leungeun ka kuring.
“Éla.”
Walon kuring pondok.
“Ké,
nya. La. Grasél milari heula bukuna. Sok tah ngobrol heula sareng Baim. Tenang
da tara ngégél.” Grasél seuri bari jeung ngaléos ka kamarna. Kuring mah ngobrol wé jeung Baim.
Nu
tadina asa éra, asa heurin ku létah téh ning antukna mah bisa ngobrol loma
jeung Baim. Da geuing Baim mah bisa wé ngobrolna. Kuring cicing gé angger wé
ngeceber, sagala diomongkeun. Ti mimiti nanyakeun ngaran lengkep kuring, malah
jeung ngaramal sagala tina jumlah hurup. Sagala dicaritakeun. Beuki kataji
waktu Baim, ngobrolkeun materi ngeunaan Akuntansi.
Gening Baim téh
jalma pinter. Daék nerangkeun kumaha
carana méh ngarti kana pelajaran Akuntansi. Enya gé kuring téh asup kana
jurusan Akuntansi, tapi sabenerna mah euweuh dasar ti SMA. Maklum SMA nyokot
jurusan IPA. Asup sotéh ka jurusan Akuntansi, duméh we dititah ku Uwa. Ngarah téréh
gawé cenah. Méh bisa gabung di kantor Uwa mun geus bérés.
Teu
daék mungpang. Kapaksa ditedunan bari jeung teu ngarti saeutik saeutik acan. Atuh
datangna Baim téh ibarat dewa penyelamat keur kuring waktu harita.
Ti
dinya remen panggih jeung Baim. Atuh lamun waktu kosong téh ayeuna mah tara
bareng deui jeung Dina. Da geus aya batur. Sakali-kali diajak Baim ka Gramédia
nu deukeut lebah kampus. Sakali kali ka perpustakaan. Atuh balikna ogé ayeuna mah mindeng dianteurkeun.
Ngan teu wani nepi ka imah mah. Ngan semet hareupeun komplék wé.
Beuki
lila kuring daék diajak Baim ka tempat
nu lain. Malah nepi ka wani bolos kuliah
sangkan bisa babarengan jeung Baim. Beuki lila haté beuki ngaberung. Teu panggih
jeung Baim téh asa kumaha boa. Hayang panggih waé unggal poé. Hayang réréntétan
salilana. Ceuk sasaha téh cenah cinta pertama
hésé rék dipopohokeuna. Leuh da jeung enyana atuh. Ngan jeung Baim
kuring namplokeun katresna. Lalayaran dina sagara kaéndahan cinta. Kuring bogoh pisan ka Baim. Baim gé sarua cenah.
Ningali kuring téh resep ku orisinilna. Asli geulis lembur sanajan teu di make up. Matakna ceuk Baim mah orisinil
luar dalam. Hem, aya-aya waé.
Nepi
ka antukna kuring boboléh. Bobor karahayuan dina leungeuna. Masrahkeun
kahormatan lain waktuna.
“Tenang… tenang.
Cinta Baim mah angger keur Éla.” Cenah ngarangkul pageuh kuring nu keur ceurik.
Asa kaduhung geus kalalanjoan.
Langsung
mulang ka lembur waktu apal aya anak nu dikandung. Sanggeus sababaraha minggu kukurilingan néangan
Baim, nu ngiles lir diteureuy bumi. Nanyakeun ka Grasél gé teu apaleun.
“Teu
apal da geus lila teu ka dieu. Kunaon nayakeun waé Baim? aya penting?” Grasél
nanya waktu kuring nganjang ka kosan.
“Taya
nanaon ngan hayang panggih waé.” Ceuk kuring tungkul. Nyumputkeun cimata. Tapi
nu ditahan teu kaampeuh antukna bedah.
Kuring nyegruk kanyeyerian. “Kuring
hamil, Sél.”Antukna kedal tina biwir.
“Gugurkeun
wé atuh, La. Naon héséna. Hayu ku Grasél
dianteur.” Ngomongna hampang euweuh
bangbaluh.
“Hah?
gugurkeun?” kuring teu percaya kana omongan Grasél.
“Enya?
Naha anéh? Ieuh, La. Geus biasa ayeuna mah nu reuneuh digugurkeun. Kecuali lamun Éla daék tanggung jawab sorangan. Bureuyeung taya
bapaan. Tapi ku jaman ayeuna mah geus lumrah kétang boga budak taya bapaan.”
“Kuring
hayang panggih jeung Baim. Rék ménta tanggung jawabna.”
“Naha
yakin Baim rék tanggung jawab?”
“Pasti.
Manéhna kacinda cinta ka Éla. Ngan jeung Baim kuring daék sumerah. Sél, tulungan…
di mana Baim?’”
“Sori, La. Grasél
teu apal di mana Baim.”
Pondok
pangharepan. Lieur mikiran nasib, kudu kumaha pilampaheun. Taya deui iwal ti
balik ka lembur, nepungan Ema. Sumegruk na dampal sukuna ménta pangampura.
“Geus
tong ménta dihampura ka Ema. Anggursing ménta pangampunan ka Gusti. Yén Éla téh
geus milampah dosa. Ayeuna mah anggur pikiran kudu janglar. Da matak kitu ogé éta
téh buah tina lampah urang nu salah. Ayeuna ceuk Éla bisa digugurkeun siga kahayang Grasél. Ehm, deudeuh nambahan tah bebendon ti Alloh. Ayeuna
mah geura tobat kana naon anu geus dipilampah.
Keun orok mah Ema nu ngurus.”
“Rujit,
Ma. Geuleuh.” Kuring neuggeulan beuteung sorangan.
“Sadar,
La… sadar.” Ema ngarangkul kuring bari jeung sarua juuh cimata.
*
“Sok
buru, La, geulis saeutik deui. Geus tong mikiran nu eunggeus-eunggeus. Anggursing
sambat ieu orok. Keun teu aya bapakna gé da aya Ema, geulis.”
“Ema
nyeri haduuuh, Ma.”
“Lilahita’ala.
Geulis. Tah kitu pangorbanan awéwé mah. Nikmat ngarasakeun kanyeri. Jihad.
Sarua Ema gé kitu baheula, anggur sabar jeung sadar. Sok tampi éta jabang bayi. Karunya. Lamun hidep indungna sorangan heuteu mikanyaah heunteu
ngaku ka budak sorangan. Rék saha deui geulis? Sok tampa méh lungur
langsar.”
Hiliwir
angin asup tina sela-sela jandéla. Omongan Ema sumulusup kana lulurung kalbu.
Kabayang kumaha nyaah jeung deudeuhna Ema ngurusanan kuring. Meureun lamun Ema teu méré
kanyaah mah, moal aya kuring di dunya. Moal bisa ruménghap siga ayeuna. Ngan
Ema nu méré kanyaah ka kuring, ngagedékeun haté kuring. Sanajan kuring salah, Ema
mah lautan hampura.
“Duh
anaking. Hampura Ema geus salah. Hampura. Geura bral ka alam dunya. Ditampa ku Ema
kalawan moal di saha-saha. Taya Bapak, pan aya indung hidep nu seja bébéla.”
Kuring ngarénghap panjang. Angin
tingsulusup minuhan rohangan. Deui deui kuring ngarénghap panjang. Angin milu
ruménghap. Ngumpulkeun tanaga pikeun nganti jabang bayi.
“Allohu
Akbar!” kuring ngaheujeun panjang. Muntang ka mantenNa. Nyambat utun inji
jeroeun dada.
“Oaaa….”
“Alhamdulillah
pameget, Bu. Kasép. Tingal pangambungna meni mancung.”***
Tidak ada komentar:
Posting Komentar