Helm
Anyar
Ti
leuleutik geus diajarkeun ka barudak sangkan kudu apik kana buku. Teu meunang
dicurat corét
sumawona disoékan. Ngahaja, méh maranehna mikanyaah kana ngaran buku. Atuh geus kitu mah
kaala hasilna, nepi ka ayeuna budak tara ieuh pirajeunan nyorétan
jeung nyoékan
buku teu puguh.
Muh
hayang gagambaran, geus dibéré dina buku khusus teu meunang
dina buku nu lainna.
Dina
hiji poé
ka imah kadatangan anak uwa geus kuliah. Dini.
“Bi,
ari helm anu siga Mang Jaka sabaraha?”
“Sabaraha
nya? Asana mah duaratusan leuwih.” Kuring nginget-nginget helm nu jadi salaki.
“Hem
awis. Ngumpulkeun heula ah.” Cenah bari
jeung cengkat, tunga tengo ka kamar nu
jadi budak, laju nyirekem teuing keur naon.
Teu lila manéhna amitan.
Budak norojol, datang ti sakola.
Uudar baju di jero kamar. Tapi teu lila
datang deui bari jeung jamedud.
“Kunaon?”
“Tingal buku Ani digambaran
pengkerna. Ku saha, Mah?”
“Duka
atuh, ngan tadi téh aya Téh Dini ka kamar. Tapi duka ku
saha kétang.
Keun wé
teu terangeun meureun Téh
Dinina, yén
buku teu kénging
dicurat corét.”
Budak
cicing ngan katangen manéhna neundeun kaheuheul anu pohara.
*
“Mamah,
Ani ka bumi uwa heula, nya.” Ceuk budak tara tara tisasari.
“Nya
sok atuh.” bari jeung hemeng kuring ngajurungkeun.
Tapi
teu lila gé
geus ngurunyung bari semu bungah. Langsung
ka kamar ngonci manéh.
Pasosoré torojol
Dini datang bari jeung mamawa helm.
“Kuliah,
Ni?”
“Moal.”
“Naha
mamawa helm sagala. Oh enya, rék némbongkeun helm anyar, nya.” Karek
tenget yén
nu dibawa téh
helm anyar.
“Enya,
anyar sih anyar, Bi... ngan.” Manéhna ngaheruk.
“Kunaon
kitu?”
“Tingali
wé
ku Bibi.”
Kuring
nilikan helm nu boga karakter Doraémon, lucu ningalina. Ngan lebah
tukang katingali aya hideung ngageblég siga
mangsi nu digeblokeun. “lh, geuning aya cawad helm téh . Tukeurkeun deui lebar.”
“Sanés
ti dituna da.”
“Ari
ngeus?”
“Tuh
ku Ani.”
“Ku
Ani?” Kuring ngageredeng. “Ani ka dieu!” kuring ngagorowok.
Budak
nyampeurkeun.
“Ieu
leres ku Ani?”
Budak
unggeuk. “Bongana atuh nyorétan buku Ani. Janten wéh
helm Téh
Dini gé
dicorétan
nganggé
mangsi. Impas 1-1” Ceuk budak bari ngabecir.***
Nina
Rahayu Nadéa
Bandung
Tidak ada komentar:
Posting Komentar