Adais
Ku Nina Rahayu Nadéa
Horéam
ka ruang guru sanajan bél istirahat geus disada. Lebar waktu, antukna anteng mariksa
pagawéan
barudak.
“Bu, kumaha damang?”
Hiji sora ngagareuwahkeun kuring nu keur mariksa. Leungeunna nyolongkrong ngajak
sasalaman.
“Ehm... pangésto.”
Nyarita bari nyidikeun kanu anyar datang. “Ké... ké... saha téa ieu
téh?”
“Ah, piraku hilap
deui. Abdi angkatan 2010, Bu.”
“Enya apal ari kana
wajahna, ngan poho deui ngaranna. Angkatan 2010 nya....” Pikiran laluncatan ka
nu geus kaliwat. Angkatan 2010. Kelas anu terkenal ku solidna, sakelas kompak
mun aya nanaon téh. Leuheung lamun kompak kana kaalusan mah. Da ieu mah
silidukung jeung nu gogoréngna. Kungsi sababaraha kali teu sakola kabéh.
Atuh basa guru datang téh di WO da muridna teu aya hiji-hiji acan.
Enya rada inget ayeuna mah. Harita waktu ujian
nasional téh
jumlah muridna 21 urang. Kulantaran kitu wayahna no absén panungtung kudu nyorangan di
kelasna. Rohangan ka hiji dieusi ku 20 murid. Rohangan kadua hiji murid. Da geus
kitu aturanna.
“Bu... karunya atuh
Wasis ngan sorangan di ruangan 2. Hijikeun wé atuh, Bu.” Hiji murid
ngadeuheus ka kuring salaku wali kelasna.
“Kumaha deui atuh,
Dam. Da aturanna kitu. Saruangan kudu aya 20 teu bisa leuwih.”
Kitu deui babaturan
nu lainna sarua daratang. Keukeuh hayang disakelaskeun. Berkah... ku perjuangan
maranehna anu datang ka dinas, antukna dinas gé mere lolongkrang. Sekat anu
ngahalangan ruangan hiji jeung dua antukna dibuka. Sanajan angger nu ngawasna mah. Tapi
ku kituna Wasis teu ngarasa keueung teuing, da bisa ningali babaturanna, jadi
teu keueung teuing.
“Adam nya?” Kuring nanya nu aya di hareupeun. “Adam
kabogohna Weni téa?” Biwir ngarenyu. “Kumaha masih kénéh angger jeung Weni?”
“Masa lalu atuh, Bu.
Barina gé
pan teu kénging
bobogohan cenah.” Manéhna seuri leutik, atoh meureun pédah kuring masih inget ka maneéna.
“Bu, kumaha barudak
angkatan ayeuna?”
“Nya biasa wé
balageur ayeuna mah, teu jiga angkatan Adam ngalieurkeun guru.”
“Ah, Ibu mah meni
kitu.” Bari jeung panonna rarat rérét ka sakurilingeun kelas. “Angger
kénéh
waé
nya, Bu, kelasna? Seueur teu muridna?”
“Enya angger butut
nya, Dam. Nya kieu gening ari sakola di pasisian mah hésé rék menyatna. Aya murid gé
masih untung. Untung teu nepi ka nutup.” Kuring seuri ka Adam. Bari jeung
sarua nitenan kelas nu pikarunyaeun.
Jauh pisan lamun disebut sakola layak téh. Lalangit na geus barolong. Atuh
kaca oge geus pareupeus, sakalieun lamun hujan badag téh. Geus kajudi, kabanjiran
jeung katirisan. Sok karunya ka barudak sakapeung mah. Lamun keur hujan badag téh
bangku sok diséréd-sérédkeun. Aya nu ngénca,
aya ogé
nu ngatuhu. Kamana waé merenahna asal teu
kahujanan.
“Sabaraha muridna
ayeuna, Bu?” Adam nanya deui.
“13. Untung teu
bangkrut gé.”
Kuring seuri. “Aéh, kumaha Dam. Geus gawé ayeuna?”
“Acan, Bu. Nuju
skripsi.”
“Leuh geuning.
Dimana?”
“Di UIN.”
“Alhamdulillah sukur
atuh ari kuliah mah. Enyaan Ibu reueus.” Kuring nepakan punduk budak. Haté
bungangang. Rék teu kitu kumaha, sakola éséma swasta di pasisian nu
jarang kaanjangan pajabat. Anu muridna rata-rata golongan ekonomi menengah ka
handap. Anu barudakna loba masalah utamana dina prilaku, balukar kurang atikan
ti kolotna. Ning aya hiji-hijieun nu nyongcolong. Adam kuliah. Ehm, Gusti haté
sarua ngilu bungah.
“Kumaha kuliah téh
resep?”
“Ah kitu wé,
Bu. Geuning kuliah mah kedah sagala milarian nyalira. Teu siga SMA nya, Bu. Tiasa
naroskeun ka guru.”
“Omat kudu
soson-soson diajar. Kudu jadi sarjana. Méh jadi conto di ieu sakola.”
“Bu, tiasa ngobrol
heula sareng barudak kelas tilu?”
“Aya naon? kadé rék
ngécéng
deui... Barudakna rék
ujian nasional sakeudeung deui.”
“Ah sanés,
Bu. Ti Universitas aya program béasiswa. Kaleresan abdi bagéan
ngadatana. Tibatan ku batur nya mending
ka alumnikeun heula atuh. Lebar. Supados maranéhna ogé kamotipasian.”
“Oh. Kitu. Sok atuh,
tapi tong lila teuing nya. Ibu keur ngabahas soal Ujian Nasional. Waktuna
samporét.”
“Sip, Bu!”
“Sok langsung
saregep, yeuh aya béwara heula.” Kuring nitah barudak dariuk. Basa bél tangara
asup disada. “Barudak, ieu téh kaka kelas maranéh.
Alumni ti dieu. Angkatan 2010. Ayeuna nyuprih élmu di perguruan tinggi
negeri.” Kuring ngarénghap panjang. Katangen barudak serius ngabandungan
omongan kuring. Komo barang nyaho Adam téh anak kuliahan katangen manéhna
kataji nakeranan.
“Waw, hébat
kuliah di negri.”
“Enya matakna maranéh
tong ngarasa minder sakola di diskotik. Di sisi kotakan. Tah ieu buktina. Adam
bisa ngabuktikeun. Sakola nu ceuk batur goréng, tapi ari ku keyeng mah
ning teu burung bisa kuliah. Malah sakeudeung deui gé ngangsitkeun. Tah ayeuna Adam
rék
ngabéwarakeun
ka maraneh perkara beasiswa. Sok
satuluyna mah ku Adam dijelaskeun.”
Kuring nyampeurkeun
ka Adam. Méré
waktu. Ari kuring mah léos wé ka kantor. Lain nyingkahan sabenerna mah. Ngan pangpangna
mah bisi Adamna kagokeun ku kuring. Améh barudak nanya sagala rupana nu leuwih
jelas, bari teu kahalangan ku kuring.
Ti dinya Adam remen
nyampeurkeun. Malah beuki dalit katingalina jeung barudak. Barudakna katingali bungah, kitu deui guru gé
bungah ngilu reueus ku kahayang Adam nu enyaan hayang nungtun adi-adi sangkan
leuwih maju.
Barudak beuki
sumanget katingalina. Lantaran Adam sok mindeng ka sakola téh
bari jeung mawa babaturan. Atuh méh teu ngaganggu kagiatan keur diajar,
Adam sok ngahaja ngobrol jeung barudak téh lamun geus rinéh sakola.
Manéhna
ngayakeun kagiatan ka barudak ti jam 2an
ka luhur. Ngariung jeung barudak téa. Barudak beuki soson-soson diajar, da
aya panyumanget. Nyatana Adam téa. Hayang hirup senang, hayang nyenangkeun
indung bapak, cenah kitu lamun ku kuring ditanya. Naha kataji heuteuna kuliah.
“Kataji pisan, Bu.”
Cenah hémpak.
*
Dina hiji poé
ka sakola aya hiji lalaki anyar pinanggih. Nanyakeun perkara sakola, naon waé
kagiatanna. Teu biasana. Ngan basa ditanya naon pamaksadan jeung lainna ku
pihak sakola. Kakara manéhna cumarita, yén saenyana keur néangan
sakola keur anakna nu karék pindah ti Jakarta.
Ngahaja néangan sakola di pasisian ngarah budakna teu kabawa ku sakaba-kaba.
Jauh tina pergaulan négatip urang kota.
Atoh wé
nu aya, sakola kanjangan sémah ti kota. Malah beut asa mobok manggih gorowong, aya
jalan komo meuntas waktu apal yén manéhna téh hiji pejabat. Susuganan wé
atuh bisa jadi donatur di ieu sakola, kitu gerentes para guru. Atuh kaayaan
sakola nepi ka bubuk leutikna
dicaritakeun satarabasna.
Saminggu ti harita
manéhna
datang deui. Rada ngajenghok da ayeuna mah manéhna maké saragam polisi. Rék
nanyakeun perkara budakna gé jadi teu tulus. Da datangna siga nu
dines pisan.
“Bu... punten
sementawis ieu sakola dilirenkeun heula tina kegiatan pembelajaran. Kumargi badé
aya pamariosan heula.”
“Pamariosan?
Pamariosan kumaha?”
“Sakola ieu sareng
sadayana muridna terindikasi kabaud ISIS.”
“ISIS?” ISIS naon
pak. Sok aya-aya waé. Moal aya nu kitu ka sakola hara-haraeun mah.”
“Ibu uninga ka
Adais?”
“Adais? Teu aya nami
Adais, di dieu mah.”
Ngarénjag
watu éta
polisi mikeun hiji poto anu cenah dedengkotna ISIS. Ayeuna keur ditéangan.
Hiji poto anu salila ieu dipikareueus. Adam. Nénéhna Adais. Adam Isis.***
Nina
Rahayu Nadéa.
Nulis dina bahasa Indonesia jeung bahasa Sunda. Tulisanna dimuat di: Pikiran Rakyat, Galamedia, Kabar Priangan,
Majalah Kartini, Analisa Medan, Radar Bojonegoro, Majalah Potret Banda Aceh,
Majalah Baca Banda Aceh, Suara Karya, Suara Daerah, Majalah Kandaga, Majalah
Mangle, SundaMidang, Galura, Tabloid
Ganesha, Tribun Jabar, Koran Merapi Yogyakarta, Majalah HAI, Majalah Loka
Tasikmalaya, Majalah Guneman, jrrd
Tolong cari tema,latar,alur,dan amanat nya.mksh
BalasHapusTolong cari tema,,alur,amanat.mksh
BalasHapus