Cipanon Kasalempang
Ku Nina Rahayu Nadéa
Ukur
seuri konéng
ningali tivi hareupeun. Paneuteup manco
kana salah sahiji jalma nu keur diwawancara. Artis, nu pastina loba anu mikagandrung. Kasép
jeung daréhdéh.
Pada muji ku balaréa.
“Jadi perkawinan Anda karena masalah ekonomi?”
“Ya begitulah.” Ceuk éta
lalaki tatag.
“Bagaimana dengan pengasuhan anak-anak?”
“Gimana sidang nanti. Yang pasti saya akan
taat pada Keputusan. Dan diharapkan itu yang terbaik untuk anak-anak. Mereka harus
tetap bahagia, tanpa terganggu dengan keadaan ini.”
“Tetap bahagia?” gerendeng haté.
Cetrék
tivi dipareuman. Anu ngagebra dina lahunan diusapan. Anaking, ceuk Bapak hideup
cenah hidep kudu tetep bahagia. Kudu tetep bagja. Enya kudu bagja anaking. Mamah
bakal tetep bajoang demi hidep geulis....
“Mamah...
saur réréncangan
aya Papah na tivi.” Devan, anak nu cikal datang.
“Saur
saha sayang. Ah, hayu gera bobo siang anggursing. Gentak, metot leungeun budak
anu rék
pisan nyetélkeun
tivi. “Teu aya Papah, kasép.”
“Ah,
Mamah baong. Devan... hoyong ningal Papah.” Suku budak najong. Ampir keuna ka
si geulis lamun teu rikat ditangkis ku leungeun mah.
“Ih,
kunaon si kasép téh beut gampil pisan nyeuseul.” Kuring nantung. Ngusapan
deudeuh si Cikal. “Teu aya Papah kasép.”
“Tapi
Devan hoyong pendak sareng Papah. Devan kangen.” Budak ngagadeud.
“Muhun
ke urang nelepon ka Papah, nya. Ayeuna Devan bobo heula yu, sareng Ade.” Bari mangku
nu leutik. Leungeun katuhu nungtun Devan. Duanana dibawa ka kamar. Nu ambek
leler sanggeus dicaritaan panjang lébar, tara ieuh dicarékan
mun keur ngadat téeh, dilawan ku usap
kanyaah. Teu dilawan ku panyarék deui. Geus apal adatna. Kudu dibawa
leuleuy. Sanajan sakapeung mah kawalahan ku pangadatanna. Bageur sarérétan
mah, tapi mun aya kahayang. Hem, ambekna
kacida gedé.
Diparéndé
nepi ka peureumna. Celengok duanana dicium sanggeus ngagebra. Neuteup
pilgenti kameumeut ati.
Geus
yakin saré.
Léos
ka cai seja sholat Lohor. Sholat khusyu nakeran ménta kanu murbeng alam. Menta kaputusan
anu pangalusna. Moal ditolih... moal didéngékeun saha waé
anu ngomongkeun goréng. Rék disebut awéwé matré, rék disebut awéwé
teu nyaho diuntung. Nu penting geus ikhtiar. Pamustungan nyanggakeun ka Alloh.
Karir Kang
Afgan harita keur meujeuhna alus. Di ditu di dieu teu weléh
loba tawaran maén sinétron. Geus puguh béntang iklan, waktu kuring ngadahup jeung
manéhna.
Loba pisan godaan. Aya awéwé nu ngaku ngaku kabogohna, aya nu ngaku istri sirina,
jeung réa
réa
deui. Éta
pisan mimitina mah nu nyababkeun kolot teu pati nyatujuan kana hubungan. Tapi
kuring panceg. Sarta ngayakinkeun nu jadi kolot yén Afgan lain lalaki siga nu
lain. Sanajan enya hirup di dunya hiburan.
Laun-laun nu
jadi kolot nyatujuan, antukna méré idin kana hubungan kuring.
Atuh kadituna mah jalan téh asa narawangan. Teu aya hahalang deui. Da, prinsip
kuring biar lambat asal selamat. Moal
nepi ka kawin lari. Rék nunggu nu jadi kolot sangkan panuju kana hubungan.
Ceuk
sasaha gé
cenah kuring awéwé nu kacida alus milikna, bisa nyandingkeun artis tenar ibu
kota. Ari kuring kawin téh lain pédah ningali artisna, tapi kacocokan
haténa.
Afgan geus cop jeung haté, kitu deui kolot geus nyaluyuan. Teu ningali statusna anu
artis. Komo deui Afgan kacida narimakeun kaayaan kuring anu ngan saukur jalma
biasa. Lain kalangan selebritis.
Rumah tangga
tengtrem, pada muji. Sanajan sanyatana aya masalah, tapi kuring tara ieuh némbongkeun.
Prinsip kuring urusan dapur mah teu meunang aya nu nyaho. Komo sanggeus dibéré
turunan. Kacinta tamplok ka barudak. Masalah anu karandapan ukur disidem dina
haté.
Tujuan ngan hiji, hayang langgeng laki rabi. Hayang ngabagjakeun nu jadi budak.
Ayeuna sapuluh
taun panceg rumah tangga, publik tinangtu waé reuwas. Waktu apal kuring
ngajukeun gugatan cerai ka salaki. Kitu deui Mamih, indung kuring kacida
reuwaseun.
“Din,
naha enya rék
pisah?”
“Saur
saha, Mih?”Teu wasa neuteup.
“Tah,
geuning buktina.” Mamih mikeun hiji koran ka kuring. Ukur dirérét.
Ehm. Geus kaambeu média. Padahal kahayang mah nyamuni Tong aya nu apaleun perkara
urusan rumah tangga kuring. Tapi teu kitu ning da média mah pasti néangan
berita anu sakira payu keur dijual. Teu paduli alus goréng, nu penting ratingna naék.
“Bener
teu?” Mamih nalék deui.
Ukur
unggeuk.
“Kunaon?”
“Teu
aya nanaon, Mih.”
“Moal
mungkin teu aya nanaon nepi ka ngagugat cerai. Afgan selingkuh jeung awéwé
lain? Pan ceuk Dine gé rék kuat. Rék tahan banting. Wajar ngaranna dunya
hiburan mah sok kitu. Perkara Afgan mindeng réréntétan jeung awéwé séjén
mah éta
mah biasa nu penting Dine na tetep percaya kanu jadi salaki. Naha ayeuna Dine
geus teu percaya kana kasatiaan Afgan?”
“Mih...
sanés
kitu....”
“Ieuhh...
Dine. Mamih téh éra
ku tatangga. Majar cenah anak Mamih matré. Dina enya gé materialistis. Tapi ari geus
kawin mah lain waktuna atuh, Din. Rék dikamanakeun nasib incu Mamih.
Perkara Afgan ayeuna keur teu payu. Tara maén sinétron, teu payu kan iklan, pan éta
mah biasa. Engké gé aya nu ngontrak deui sugan. Apanan Mamih gé
masih bisa méré
dahar ka maranéh. Karunya atuh ka Afgan. Anggur salaki keur nyirorot téh
béré
payumanget. Gedékeun haténa. Lain ménta cerai waé...”
Mamih ngocoblak. Teu méré kasempeten keur kuring pikeun nyarita.
Ah,
barina gé
mending diantep waé. Kuring geus iklas rék dicap jadi awéwé
naon waé
ku sasaha. Kuring kacida ngajaga kahormatan kulawarga. Kuring mah hayang
nyalametkeun budak. Peun, ngan sakitu kahayang téh.
“Din...
Akang cinta pisan ka Dine. Jangji moal deui méré tunggara... Please Din. Akang nyaah pisan ka Dine ogé
ka barudak. Angkat atuh teleponna Din... “
Salah
sahiji SMS Afgan di baca.
Kang Afgan
hapunten Dine.... Dine gé nyaah ka Akang. Ngan kumaha atuh beurat pisan, Kang. Dine
nyaah ka turunan. Dine tos panceg kana putusan. Keun urang patabih, ngan haté
pacaket. Éta
nu langkung utami. Tinimbang pacaket dina tresna tapi batin ceurik. Teu kiat nandanganna, Kang.
Kedah kumaha atuh Dine téh. Urang silidoakeun waé nya, Kang. Akang sing
percanten Dine nyaah ka Akang. Satia saujratna ka Akang. Ieu cara anu terbaik kanggé
urang duaan. Dine nyaah kacida nyaaaah. Hésé kanggé ngedalkeunna, Kang. Sakedahna Akang ngadukung Dine. Pan saur Akang
gé,
kabagjaan barudak langkung utami. Insya alloh Dine bakal ngajaga buah haté
urang. Akang sing séhat nya.... sing teras éksis berkarir. Urang
silihdoakeun mudah-mudahan urang salawasna aya dina panangtayungan mantenNa.
Mun Akang nyaah ka Dine... ka barudak. Panuhun Dine, Akang kedah nampi kahoyong
Dine. Pepegatan. Ukur urang duaan nu terang marga lantaranna. Demi pujaning ati
Dine, Akang kuanjeun, Dine ridho janten paneumbleuhan balaréa.
Dianggap jadi awéwé runtah, awéwé matré, awéwé nu teu becus ngajaga rumah
tangga. Heunteu waé ku batur dalah ku kolot nyalira apanan Dine anu dilepatkeun..
Hiji deui, panuhun
Akang tong hoyong pendak sareng Dine. Dine kacida nyaahna ka Akang. Akang nu
uninga kumaha haté Dine saujratna.
Send.
Kuring ngirimkeun éta
tulisan kana email Afgan.
“Hapunten
Akang...” ukur sakitu balesan ti manéhna.
“Din...
ari ceuk Mamih mah. Urang riungkeun heula atuh antar keluarga. Méh,
aya jalan terbaik. Mamih mah embung ningali budak Mamih jadi randa. Sugan atuh
bisa ngarangkep deui tong kejot borosot. Isuk cenah Afgan rék
ka dieu hayang heula panggih jeung Dine.”
“Muhun
mangga éta
mah teu langkung mamih. Badé ngariung sareng keluraga besar mah.
Mung hapunten Dine moal tiasa ngiring ngariung. Kaputusan Dine tos panceg.
Hoyong pepegatan. Perkawis janten randa. Tong sieun, Mih. Dine tos siap lahir
batinna. Omat deui Mamih tong maksa ka Dine sangkan kersa pendak sareng Afgan.
Mun mamih nyaah ka Dine.” Kuring ngaléos ka kamar.
Enya
memang. Kuring geus embung panggih jeung Afgan. Haté mah sabenerna kumejot.
Karunya... kangen.... Ah, sakabéh rasa pagaliwota dina dada. Ngan ayeuna
kudu pageuh. Teu meunang éléh ku rasa karunya. Pan nu enggeus-enggeus téh
kitu. Kuring sok teu téga, sok éléh. Tungtungna léah
deui mun geus panggih jeung Afgan. Komo mun paduduaan mah. Rasa karunya, kahéman
kuring, rasa cinta kuring sok tumuwuh ningali manéhna nu ceurik nyegrug, nyium
suku kuring. Jangji rék méré katingtriman diri. Éta nu ngahudang kuring nu
antukna balik deui ka Afgan. Ngalaman deui rasa kuciwa. Ayeuna kuring kudu
pengkuh. Moal deui panggih jeung Afgan. Keun cukup Mamih jeung kulawarga besar
nu nyanghareupan.
“Bagaimana untuk langkah selanjutnya. Setelah
bercerai?” hiji réporter nanya ka Afgan.
“Berkarir kembali di jalur sinetron. Menata
hati kembali...”
“Ada keinginan untuk segera mencari
pengganti?”
“Ya... kalau Alloh memberi.” Afgan imut.
“Nuhun
Afgan... geus méré kabébasan ka kuring. Diduakeun anjeun sing gera meunang
pasangan anu bisa nyenangkeun, anu bisa ngarti kaayaan Afgan.” Haée
kuring nyarita. Rok nu dipaké lalaunan dikaluhurkeun. ti suku nepi
ka pingping raca ku panenggeul. Panon
peureum, nganteur lalakon. Cipanon murubut teu kaampeuh. Waktu neuteup si cikal
nu ngageubra. Kasalempang nganjang, inget pangadatanna nyeplés bapakna. “Gusti paparin pun
anak jalan anu lempeng. Mugia salamina aya dina panangtayungan Anjeun.”
“Afgan
nyaah ka anjeun kacida Dine” jelebét cameti keuna kana suku... kana
pingping. Getih bijil. Afgan ngagalémoh bakat ku suka. Beuki humarurung.
Nafsuna beuki ngagedur “Hapunten Afgan... Afgan nyaah pisan ka Dine. Énjing
urang jalan-jalan ka Singapur nya. ” Manéhna ngusap buuk kuring, nyusut getih
anu ngaley tina sela-sela biwir.***
Nina
Rahayu Nadéa.
Menulis dalam bahasa Indonesia dan bahasa Sunda. Tulisannya dimuat di: Pikiran Rakyat, Galamedia, Kabar Priangan,
Majalah Kartini, Analisa Medan, Radar Bojonegoro, Majalah Potret Banda Aceh,
Majalah Baca Banda Aceh, Suara Karya, Suara Daerah, Majalah Kandaga, Majalah
Mangle, SundaMidang, Galura, Tabloid
Ganesha, Tribun Jabar, Koran Merapi Yogyakarta, Majalah HAI, Majalah Loka
Tasikmalaya, Majalah Guneman, Sastra
Sumbar, Majalah Bobo, Buletin Jejak, KOMPAS, Kedaulatan Rakyat, Solo Pos, Joglo
Semar, Radar Bayuwangi, dll
Tidak ada komentar:
Posting Komentar